11 студзеня Святы Айцец прыняў на аўдыенцыі Ілеану Аржэнцін, вядомую барацьбой за правы інвалідаў. Дэпутат італьянскага парламента сама належыць да асоб з абмежаванымі магчымасцямі і перасоўваецца на інваліднай калясцы.

Раней Арджэнцін даслала Святому Айцу ліст, просячы пасадзейнічаць у вырашэнні розных праблем, звязаных з інвалідамі і іх сітуацыяй. Гэта стала падставай для запрашэння актывісткі Пантыфікам.

Галоўнай тэмай размовы стала неабходнасць падтрымкі, якая павінна быць прадстаўлена, у прыватнасці, бацькам людзей з цяжкімі формамі інваліднасці, якія жывуць з глыбокай заклапочанасцю ў сувязі з перспектывай, якая чакае дзяцей пасля іх смерці. Ілеана Аржэнцін і Папа Францішак гаварылі таксама на іншыя тэмы, такія, як ліквідацыя архітэктурных бар’ераў у грамадскіх і касцёльных будынках.

Пантыфік выказаў вялікую ўвагу і цікавасць да ўсяго, што было сказана італьянскай актывісткай, і запэўніў у сваёй падтрымцы ініцыятыў, якія маюць на мэце дапамогу інвалідам і інфармаванне грамадства аб праблемах, звязаных з інваліднасцю.

Паводле беларускай рэдакцыі Ватыканскага радыё

(AG)