17 жніўня 2014 г., чацвёрты дзень апостальскага падарожжа ў Паўднёвую Карэю, Папа Францішак пачаў з удзялення сакрамэнту хросту ў капліцы нунцыятуры ў Сеуле. Вернікам, які папрасіў аб уступленні ў хрысціянскую супольнасць, быў Лі О Джын, бацька аднаго з юнакоў, загінуўшых падчас крушэння пасажырскага парома “Севол” у красавіку 2014 г.

Яшчэ перад прыездам Пантыфіка ён здзейсніў пешую пілігрымку, прайшоўшы амаль 900 км і несучы ў руках драўляны крыж. 15 жніўня 2014 г. перад святой Імшой на стадыёне ў Тэджоне мужчына падышоў да Святога Айца і папрасіў аб удзяленні сакрамэнту.

У цырымоніі прынялі ўдзел іншыя дзеці Лі О Джына. Праводзіў абрад карэйскі святар, а Пантыфік здзейсніў паліванне вадой і намашчэнне святым хрызмам. Лі О Джын пажадаў хрысціцца пад іменем Францішак.

Падчас крушэння парома “Севол” загінулі амаль 300 чалавек, большасць з якіх склалі падлеткі. Папа назваў трагедыю “нацыянальнай катастрофай”, а ў якасці сімвалу салідарнасці са сваякамі загінуўшых носіць на сутане падчас свайго візіту ў Паўднёвую Карэю маленькую жоўтую ленту.

Паводле беларускай рэдакцыі Ватыканскага радыё

(AG)