Папа Францішак выказаў свой глыбокі смутак у сувязі з тэрарыстычнымі актамі, якія адбыліся ў сталіцы Францыі позна вечарам 13 лістапада і адабралі жыцці па меншай меры ў 120 чалавек.

 «Прэзідэнту Французскай Рэспублікі і ўсім грамадзянам я дасылаю выразы майго глыбокага спачування. Выказваю сваю блізкасць асаблівым чынам сем’ям тых, хто страціў жыццё і быў паранены», – сказаў Пантыфік падчас сустрэчы з вернікамі на малітве «Анёл Панскі» ў Ватыкане 15 лістапада. 

«Такога роду варварства пакідае нас у шоку і здзіўляе, як чалавечае сэрца можа нарадзіць і здзейсніць такія жудасныя рэчы, што ўзрушылі не толькі Францыю, але і ўвесь свет. Сутыкнуўшыся з гэтымі непрымальнымі актамі, нельга не асудзіць невымоўную абразу чалавечай годнасці. Я хачу моцна пацвердзіць, што шлях насілля і нянавісці не вырашыць праблем чалавецтва!» – дадаў Святы Айцец.

Папа запрасіў сабраных на плошчы св. Пятра далучыцца да яго малітвы і «даверыць Божай міласэрнасці бездапаможных ахвяр гэтай трагедыі». «Дзева Марыя, Маці Міласэрнасці, няхай паселіць у сэрцах усіх думкі мудрасці і жаданне міру. Мы просім Яе бараніць і захоўваць узлюблены французскі народ, Еўропу і ўвесь свет», – сказаў Пантыфік.

Да малітвы за ахвяр тэрактаў заклікаў Папа і на сваім «твітэры». «Я выказваю мой глыбокі боль з прычыны тэрактаў у Парыжы. Маліцеся са мной за ахвяр і іх сем’і», – так гучыць твіт Святога Айца.

Паводле беларускай рэдакцыі Ватыканскага радыё

(AG)