Бедныя і бяздомныя Рыма 17 снежня адзначылі з Папам Францішкам яго 79-ы дзень нараджэння. Святы Айцец перадаў ім найбольшы з атрыманых тортаў.

Торт быў прыгатаваны італьянскімі кандытарамі. Святочнае печыва разам з гарачай гарбатай раздавалі пад каланадай плошчы св. Пятра, ля ўваходу ў памяшканне з душавымі кабінамі для бяздомных, якое ў гэтым месцы было зроблена па волі Папы Францішка.

Таксама іншыя салодкія падарункі трапілі ў прытулкі і сталоўкі для бяздомных Рыма з дадатковай харчовай дапамогай на святы. Развёз падарункі Папскі элемазінарый арцыбіскуп Конрад Краеўскі разам з валанцёрамі. «Святы Айцец папрасіў нас, каб падарункі, атрыманыя ім, былі перададзены найбольш патрабуючым. Такім чынам, Папа Францішак пашырыў папскі стол і запрасіў да яго на свой дзень нараджэння мноства пакутуючых і маючых патрэбу», — сказаў іерарх.

У мінулым годзе з нагоды свайго дня нараджэння Папа Францішак падарыў бяздомным цёплыя спальныя мяшкі.

Паводле беларускай рэдакцыі Ватыканскага радыё

(AG)