26 студзеня ў Ватыкане Святы Айцец Францішак прыняў на аўдыенцыі Хасана Рухані, Прэзідэнта Ісламскай Рэспублікі Іран.

Палітык правёў сустрэчу таксама з кардыналам Дзяржсакратаром П’етро Паралінам, якога суправаджаў арцыбіскуп Пол Рычард Галахер, сакратар па сувязях Святога Пасаду з дзяржавамі.

Падчас сардэчных размоў была падкрэслена важнасць агульных духоўных каштоўнасцяў і зроблена спасылка на добры стан адносін паміж Апостальскай Сталіцай і Іранам. Таксама гаворка ішла пра жыццё Каталіцкага Касцёла ў краіне і дзеянні Святога Пасаду на карысць абароны годнасці чалавечай асобы і свабоды веравызнання.

Была закранута праблема пагаднення адносна іранскай ядзернай праграмы.

«Іран, нароўні з іншымі краінамі рэгіёна, пакліканы адыграць важную ролю ў садзейнічанні належных палітычных рашэнняў адносна праблем Блізкага Усходу, каб змагацца з распаўсюджваннем тэрарызму і гандлю зброяй» — падкрэслілі ўдзельнікі сустрэчы.

Падчас ватыканскіх сустрэч бакі падкрэслілі важнасць міжрэлігійнага дыялогу і адказнасці рэлігійных супольнасцяў у справе прымірэння, цярпімасці і міру.

Паводле беларускай рэдакцыі Ватыканскага радыё (MV)