З заклікам аб забеспячэнні годнай працай, зыходзячы са становiшча сем’яў, звярнуўся Папа Францішак 30 чэрвеня ў канцы юбілейнай агульнай аўдыенцыі ў Ватыкане.

Пантыфік прывітаў Італьянскую асацыяцыю працоўнага кансалтынгу.

Святы Айцец заклікаў яе членаў пашыраць культуру працы, якая гарантуе годнасць асобы і агульнае дабро грамадства, зыходзячы з патрэб яго асноўнай ячэйкі, якой з’яўляецца сям’я. Папа адзначыў, што менавіта сям’я больш за ўсіх пакутуе ад наступстваў дрэннай сітуацыі з працай: яе адсутнасці або няўстойлівасці.

Пантыфік падкрэсліў, што задачай працоўных дарадцаў з’яўляецца не толькі сацыяльная дапамога, але і намаганні, каб на нацыянальным і еўрапейскім узроўнях інстытуты і эканамічныя фактары ў поўнай ступені імкнуліся да мэты, якой з’яўляецца поўная і годная занятасць. «Бо менавіта праца дае годнасць», — падкрэсліў Папа Францішак.

Паводле беларускай рэдакцыі Ватыканскага радыё