У гаміліі падчас урачыстай Эўхарыстыі Папа падкрэсліў, што місія святара — «несці Евангелле, каб усе спазналі радасць Хрыста і каб гэта радасць панавала ў кожным месцы». «Што можа быць лепшым, больш захапляльным, чым супрацоўнічаць у пашырэнні Слова жыцця ў свеце, перадаваць жывую ваду Святога Духа? Абвяшчаць і даваць сведчанне радасці — у гэтым сутнасць вашай місіі», — звяртаўся Святы Айцец да нэапрэзбітэраў.

Напрыканцы Бэнэдыкт XVI пажадаў новым святарам, каб надзея, укаранёная ў веры, магла ўсё больш узрастаць у іх, каб заўсёды яны «маглі быць яе мудрымі і велікадушнымі, лагоднымі і моцнымі, поўнымі павагі і вернымі сведкамі», — сказаў Папа.