«На дарогах усяго свету кожны дзень ідзе вайна. Неабходна распачаць дзеянні, накіраваныя на памяншэнне колькасці ахвяраў гэтай разні», — пракаментаваў інфармацыю пра чарговыя ахвяры падчас аўтамабільных аварый арцыбіскуп Агостыно Маркетто.Сакратар Папскай рады па справах мігрантаў і падарожнікаў падкрэсліў, што на дарогах па-ранейшаму гіне вельмі шмат людзей. Сакратар ватыканскага ведамства заўважыў, што павелічэнне бяспекі на дарозе — гэта заданне не толькі кампетэнтных уладаў паасобных краінаў, але таксама Касцёла, які павінен выхоўваць адказнае сумленне.
Арцыбіскуп Маркетто паведаміў, што восенню бягучага года ў сталіцы Калумбіі (Паўднёвая Амерыка) адбудзецца кантынентальны кангрэс, прысвечаны бяспецы на дарозе. Гаворка таксама пойдзе пра вулічную прастытуцыю, пра людзей, якія не маюць уласнага жылля, і таму вымушаны жыць на вуліцы.
Паводле матэрыялаў інфармацыйных агенцтваў