У абліччы глабальнага эканамічнага крызісу неабходна нанава адкрыць этычныя прынцыпы эканомікі і «вялікую грамадскую салідарнасць», — лічыць рэктар Папскага Латэранскага універсітэта арцыбіскуп Рыно Фізікелла.

Старшыня Папскай акадэміі «Pro Vita» і капелан італьянскага парламента падчас прэзентацыі кнігі, прысвечанай «грамадскай рынкавай эканоміцы», заўважыў, што цяперашні крызіс з’яўляецца наступствам недаацэньвання этычных крытэрыяў. Таму, на яго думку, Касцёл можа ўнесці значны ўклад у пераадольванне падзелаў на багатыя і бедныя краіны.

«Несумненна існуюць формы этычнай эканомікі, аднак гутарка ідзе пра паняцці, якія павінны рэалізавацца ў канкрэтнай сітуацыі. Асаблівую занепакоенасць выклікае тое, што крызіс адчуюць усе, таму неабходна больш дальнабачна глядзець у будучыню, каб адкрыць вялікую грамадскую салідарнасць», — адзначыў арцыбіскуп Фізікелла.