У нядзелю 20 чэрвеня 2010 г. Сакратар па адносінах з дзяржавамі Дзяржаўнага Сакратарыяту Апостальскай Сталіцы арцыбіскуп Дамінік Мамбэрці завяршыў шасцідзённы візіт на Кубу, прымеркаваны да 75-й гадавіны ўстанаўлення дыпламатычных адносін гэтай краіны з Ватыканам. Кульмінацыяй візіту стала непрадугледжаная ў афіцыйнай праграме, аднак чаканая сустрэча з прэзідэнтам Кубы Раулем Кастро. Падчас сустрэчы было адзначана, што візіт высокага госця дазволіў засведчыць спрыяльную атмасферу і значны прагрэс у адносінах паміж дзяржавай і Касцёлам на Кубе.
У межах візіту ватыканскі іерарх прыняў удзел у мерапрыемствах «Сацыяльнага тыдня Касцёла», а ў мінулы чацвер узначаліў святую Імшу ў катэдральным касцёле Гаваны, падчас якой звярнуўся да прысутных у гаміліі.
Касцёл, па словах арцыбіскупа, мае свае сацыяльныя абавязкі. «Гэта клопат пра састарэлых, хворых і бедных, а таксама выхаванне духоўнасці, — адзначыў арцыбіскуп Мамбэрці. — Палітычная супольнасць і Касцёл аўтаномныя, дзейнічаюць у сваёй асабістай плоскасці, аднак яны абодвы закліканы служыць асабістаму і сацыяльнаму дабру чалавека. Супрацоўнічаючы, Касцёл і дзяржава змогуць з большай эфектыўнасцю выконваць сваю місію, а інструментам такога супрацоўніцтва якраз і з’яўляюцца дыпламатычныя адносіны. За мінулыя 75 год зносіны Ватыкана з Кубай ведалі ўзлёты і падзенні, прайшлі праз шмат іспытаў, а цяпер выйшлі на стабільны ўзровень. Аднак зрабіць у гэтай галіне трэба значна больш, чым ужо зроблена».
Напрыканцы свайго візіту ў Кубу старшыня Дзяржаўнага Сакратарыяту Апостальскай Сталіцы арцыбіскуп Дамінік Мамбэрці выказаў надзею на працяг дыялога Касцёла з кубінскай дзяржавай, плёны якога, на думку іерарха, ужо відавочныя.