Пра тое, што лефэўрысты не могуць адобрыць «дагматычную прэамбулу» ў цяперашнім выглядзе, паведаміў генеральны настаяцель Брацтва св. Пія Х біскуп Бэрнард Фэлей. Апостальская Сталіца прызнала гэты дакумент неабходным для аднаўлення поўнага адзінства і ўключэння Брацтва ў структуры Касцёла.

Біскуп Фэлей адзначыў, што ў бліжэйшыя дні прадставіць Апостальскай Сталіцы пазіцыю лефэўрыстаў. Іерарх указаў, што да прэамбулы далучана заўвага, паводле якой лефэўрысты могуць звярнуцца ў Ватыкан з прапановай магчымых мадыфікацый. Менавіта з просьбай аб істотных зменах у змесце прэамбулы біскуп Фэлей і плануе звярнуцца ў Ватыкан. Аднак рашэнне будзе сыходзіць ад кампетэнтных ведамстваў Рымскай Курыі.