Праз тры гады пасля з’яўлення на выдавецкім рынку каталіцкага катэхізіса для моладзі «Youcat» яго тыраж дасягнуў 4,5 млн. асобнікаў. Паводле ініцыятара яго выдання, нямецкага тэолага і журналіста Бернхарда Мойзера, гэта «самы буйны пасля Бібліі праект каталіцкай кнігі ў свеце».

«Youcat» складаецца з 527 пытанняў і адказаў. На больш чым 300 старонках на даступнай для моладзі мове ў ім апісваюцца прынцыпы каталіцкай веры. У працы над «Youcat» бралі ўдзел святары, тэолагі, катэхеты, а таксама больш за 60 маладых людзей.

За апошнія гады пад лагатыпам «Youcat» былі выдадзены кішэнныя календары, дапаможнікі для падрыхтоўкі да сакрамэнтаў канфірмацыі і пакаяння. У бліжэйшы час з’явіцца адаптаваны да патрэбаў маладых людзей так званы «сацыяльны катэхізіс» («Docat»), а таксама катэхізіс для дзяцей («Kids’Cat») і Біблія для моладзі. У падрыхтоўцы зместу гэтых публікацый удзельнічаюць не толькі тэолагі, але і маладыя людзі.

 Паводле Беларускай рэдакцыі Ватыканскага радыё, (AYU)