19 студзеня распачаўся душпастырскі візіт у В’етнам кардынала Фернандо Філоні, прэфекта Кангрэгацыі Евангелізацыі Народаў. Іерарх суправаджаў Пантыфіка падчас яго падарожжа ў Шры-Ланку і на Філіпіны і пасля яго заканчэння накіраваўся ў яшчэ адну азіяцкую краіну, прыняўшы запрашэнне мясцовага епіскапату.Візіт іерарха працягнецца да 26 студзеня. За гэты час кардынал правядзе шэраг важных сустрэч у розных рэгіёнах краіны, сустрэнецца з в’етнамскімі біскупамі, святарамі, кансэкраванымі асобамі і свецкімі вернікамі, наведае мясцовыя семінарыі, парафіі, душпастырскія цэнтры. Таксама кардынал наведае марыйны санктуарый у Лавангу, дзе Маці Божая аб’яўлялася ў 1798 г., і даверыць Яе апецы евангелізацыю свету і ў прыватнасці В’етнама.
23 студзеня кардынал узначаліць Эўхарыстыю з нагоды 400-годдзя абвяшчэння Божага слова ў В’етнаме. Літургія пройдзе ў каталіцкай парафіі Хаяну — аднаго з найстаражытнейшых гарадоў краіны. Кардынал будзе таксама цэлебраваць святыя Імшы з нагоды 50-годдзя некаторых в’етнамскіх дыяцэзій.
Візіт высокага ватыканскага іерарха з’яўляецца значнай падзеяй у святле паляпшэння адносін паміж Святым Пасадам і В'етнамам, якія былі перарваны ў 1975 годзе і на працягу апошняга дзесяцігоддзя паступова аднаўляюцца.
Паводле беларускай рэдакцыі Ватыканскага радыё, (AYU)