Дзяржаўны камітэт Малайзіі па шарыяту забараніў мусульманам гуляць у Pokemon Go на федэральных тэрыторыях. Раней было вядома, што першай краінай, якая забараніла гульню на дзяржаўным узроўні, стаў Іран.
«Ісламскі прававы камітэт выразіў надзею на тое, што мусульмане, асабліва на федэральных тэрыторыях, не будуць карыстацца гульнявым дадаткам», — адзначаецца ў заяве ісламскага прававога камітэту.
Паводле муфтыя федэральных тэрыторый дзяржавы Зулкіфлі аль-Бакры, захапленне паляваннем на пакемонаў можа прывесці да росту папулярнасці азартных гульняў, якія, паводле яго слоў, «безумоўна, з’яўляюцца забароненымі». Акрамя таго, муфтый лічыць, што дадатак можа выкарыстоўвацца ў шпіёнскіх мэтах, а таксама парушае недатыкальнасць прыватнага жыцця.
Pokemon GO — бясплатны дадатак, заснаваны на тэхналогіі «дапоўненай рэальнасці» — лічбавы і рэальны свет з’ядноўваюцца, паколькі карцінка на экране смартфона праецыруецца на лакацыі рэальнага свету.
Адна з галоўных мэтаў гульні — злавіць пакемона — прымусіла выйсці на вуліцы, паркі, пляжы многіх людзей, цалкам захопленых працэсам.