Прэзідэнт Беларусі Аляксандр Лукашэнка і Папа Рымскі Францішак падчас сустрэчы ў Апостальскім палацы ў Ватыкане 21 мая абмеркавалі развіццё адносін Беларусі з Рыма-Каталіцкім Касцёлам.

Сустрэча працягвалася каля 40 хвілін, з іх 25 хвілін гутарка адбывалася ў фармаце «адзін на адзін». 

Папу Францішка суправаджаў арцыбіскуп Пол Рычард Галахер, сакратар Святога Пасаду па адносінах з дзяржавамі.

Як перадае БЕЛТА, сустрэча праходзіла ў сяброўскай атмасферы. Ужо ў прысутнасці членаў афіцыйнай дэлегацыі бакі абмяняліся падарункамі. Кіраўнік беларускай дзяржавы прынёс у дар Пантыфіку копію крыжа Еўфрасінні Полацкай, выкананую з дапамогай унікальнай тэхнікі разьбы па дрэве, а таксама мадэль карэты, зробленую па той жа тэхналогіі, і галаграфічны абраз.

Як адзначыў Аляксандр Лукашэнка, гэты абраз яднае ў сабе гісторыю і сучаснасць.

Папа Францішак у сваю чаргу падарыў Прэзідэнту экземпляры энцыклік «Lumen Fidei» і «Laudato si'», а таксама Апостальскай адгартацыі «Amoris Laetitia». Аляксандр Лукашэнка паабяцаў азнаёміцца з іх зместам і перадаць іх на захоўванне ў Прэзідэнцкую бібліятэку. Яшчэ адзін падарунак Пантыфіка — мастацкая выява аліўкавага дрэва, якое з’яўляецца сімвалам міру.

У гэтым плане Святы Айцец асабліва падкрэсліў тую мірную місію, якую ўзяла на сябе Беларусь. «Мінск можа быць месцам міру», — сказаў наступнік св. Пятра.

Аляксандр Лукашэнка дадаткова зрабіў і асабісты падарунак — сваю ручку, якой карыстаўся доўгі час. Ён прызнаўся, што робіць такі жэст упершыню ў жыцці, падкрэсліваючы выключнасць асобы Папы. «Асабісты» падарунак ад Святога Айца таксама не прымусіў чакаць сябе — Аляксандр Лукашэнка атрымаў асабістую ручку Папы Францішка.

Як перадае БЕЛТА, на заканчэнне сустрэчы Прэзідэнт Беларусі і Пантыфік прыязна развіталіся. Аляксандр Лукашэнка прапанаваў Папу Рымскаму наведаць выстаўку беларускіх абразоў, якая нядаўна адкрылася ў Ватыкане. Таксама Прэзідэнт запрасіў Святога Айца здзейсніць візіт у Беларусь.

«Прыязджайце да нас. Вы атрымаеце столькі сіл і здароўя, колькі ні ў адной кропцы свету», — сказаў кіраўнік беларускай дзяржавы.
Пасля аўдыенцыі ў Пантыфіка адбылася таксама сустрэча Аляксандра Лукашэнкі з Дзяржаўным Сакратаром Папы кардыналам П’етро Паралінам.

Як паведамляе беларуская рэдакцыя Ватыканскага радыё, кардынал П'етро Паралін атрымаў ад кіраўніка дзяржавы сярэбраную копію «Апошняй вячэры» і падарыў яму гравюру, выкананую ў лімітаванай серыі спецыяльна да Года Міласэрнасці ў Каталіцкім Касцёле.

Паводле БЕЛТА і беларускай рэдакцыі Ватыканскага радыё, (ils)