Ардынарый Кіева-Жытомірскай дыяцэзіі адышоў у вечнасць у Гродне, дзе прымаў удзел у Нацыянальным эўхарыстычным кангрэсе, які праходзіў 24-26 мая. Верагодна, прычынай смерці сталі праблемы з сэрцам.

Цела іерарха знайшлі 27 мая ў яго асабістым пакоі. Арцыбіскупу Пятру Мальчуку было 50 гадоў.

«Браты-біскупы Канферэнцыі Біскупаў лацінскага абраду і ўвесь Каталіцкі Касцёл ва Украіне сумуе з той прычыны, што адданы вучань Хрыста так хутка скончыў зямную пілігрымку, але адначасова поўныя надзеі, што арцыбіскуп Пётр дзеліць вечную вячэру з Панам і мае невымоўнае шчасце бачыць Яго», — гаворыцца ў лісце Канферэнцыі Каталіцкіх Біскупаў ва Украіне.

Пётр Мальчук нарадзіўся 17 ліпеня 1965 года ў с. Слабода-Рашкава ў Малдове. Пасля заканчэння сярэдняй школы і тэрміновай вайсковай службы паступіў у 1986 годзе ў Вышэйшую духоўную семінарыю ў г. Рыга (Латвія).

3 студзеня 1989 года ўступіў у Ордэн Братоў Меншых (францішканаў). 7 чэрвеня 1992 года прыняў прэзбітэрскае пасвячэнне. У 1992-1998 гадах вучыўся ў Рыме ў Папскім універсітэце Antonianum, дзе атрымаў ступень доктора теалогіі.

У 1998-1999 гадах працаваў вікарыем у парафіі Св. Ганны ў г. Палоннае. У 1999-2004 гадах быў кусташам Братоў Меншых ва Украіне, у 2004-2007 гадах — правінцыялам правінцыі Святога Міхала Арханёла Братоў Меншых ва Украіне, у 2007-2008 гадах — эканомам правінцыі Братоў Меншых ва Украіне.

29 сакавіка 2008 года Папа Бэнэдыкт XVI прызначыў а. Пятра Мальчука OFM дапаможным біскупам Адэска-Сімферопальскай дыяцэзіі, а 15 чэрвеня 2011 года — ардынарыем Кіева-Жытомірскай дыяцэзіі, надаючы яму тытул арцыбіскупа ad personam.

Kmc.in.ua (АлГ)