20 лютага ў польскім горадзе Замосце на 66-м годзе жыцця адышоў у вечнасць архітэктар Віктар Вільк. Гэты чалавек вядомы асабліва тым, што яго рэстаўрацыйна-будаўнічая фірма «Рэнаватар» на працягу многіх гадоў выконвала рэстаўрацыйныя працы сакральных аб’ектаў у розных рэгіёнах Беларусі.
Складаная архітэктурная і мастацкая праца архітэктара Вілька і яго супрацоўнікаў часта мела выраз бескарыслівай дапамогі, як дар Касцёлу ў Беларусі.
Віктар Вільк асабіста ўдзельнічаў у адбудове і адраджэнні знакавых святынь у Беларусі. Сярод іх асаблівае месца займаюць адноўленыя катэдральны касцёл у Пінску і архікатэдра ў Мінску, а таксама велічны комплекс будынкаў Міждыяцэзіяльнай вышэйшай духоўнай семінарыі ў Пінску.
Семінарыйная супольнасць у Пінску выказвае шчырыя спачуванні спадарыні Крысціне, жонцы святой памяці Віктара Вілька, яго дзецям і родным. У многіх касцёлах Беларусі (асабліва ў Пінскай дыяцэзіі) у гэтыя дні ўзносіцца малітва ўдзячнасці Богу за дар гэтай асобы, якая ўнесла велізарны ўклад ў адраджэнне Касцёла на нашай зямлі.
Молімся аб вечным супакоі душы ў небе і дары вечнага жыцця для святой памяці Віктара Вілька.