4 сакавіка 2012 г. у Оршу прыбылі больш за 70 чалавек з Мінска, Гомеля, Гродна, Віцебска, Наваполацка, Крупак, Жодзіна, Барысава, Шуміліна і інш. мястэчак, якія імкнуцца шукаць Бога ў штодзённым жыцці і паглыбляць свае адносіны з Ім шляхам «працы ў вінаградніку». Назва сустрэч не выпадковая, бо ў Божым вінаградніку кожнаму знойдзецца месца і праца: адны саджаюць, іншыя паліваюць для таго, каб Айцец Нябесны ўзрасціў.

Сустрэча была прысвечана тэме «Спазнаеце праўду, і праўда вас вызваліць». Распачалося ўсё ранішняй малітвай праслаўлення, затым адбыліся некалькі канферэнцый, падчас якіх кожны ўдзельнік змог задаць сабе пілатаўскае пытанне: «Што ёсць праўда?», падзяліцца сваім адкрыццём з іншымі, засведчыць аб моцы праўды ў сваей штодзённасці. Удзельнікі мелі магчымасць споведзі, духоўных размоў, асабістай размовы з Езусам, прысутным у Найсвяцейшым Сакрамэнце, а таксама ўдзелу ў святой Імшы. Пасля літургіі адбылася заступніцкая малітва з адарацыяй Найсвяцейшага Сакрамэнту, а ў гэты час удзялялася споведзь і адбывалася малітва святароў за ўдзельнікаў сустрэчы. Усяго ў аршанскай капліцы прысутнічалі 5 святароў, якія разам з пробашчам парафіі а. Аляксандрам Жарнасекам служылі сваім парафіянам. Дзякуючы гэтай сустрэчы, кожны змог стаць на адзін дзень бліжэй да Праўды.

Дадатковую інфармацыю можна атрымаць на сайце www.viartannie.org. Наступная сустрэча «вінаградніка» пройдзе ў Оршы 21 красавіка.

Запіс на сустрэчу адбываецца па тэлефоне:

+375 29 713 02 33     а. Аляксандр

Анастасія Харкевіч