14 чэрвеня ў парафіі Святога Антонія Падуанскага ў Віцебску вернікі, нягледзячы на нязручнасці, звязаныя з перабудовай касцёла, урачыста адсвяткавалі ў часовай капліцы фэст у гонар свайго святога.

Святую Імшу цэлебраваў госць - айцец Сяргей Мацюшонак OFMCap разам з пробашчам парафіі кс. Вячаславам Барком і вікарыем а. Станіславам Памыкайлам SJ.

У гаміліі айцец Сяргей Мацюшонак нагадаў пра жыццёвы шлях святога Антонія Падуанскага, які стаў простым і папулярным у народзе красамоўным прапаведнікам Слова Хрыстовага, і заахвоціў усіх браць прыклад з жыцця святога.

Пробашч парафіі кс. Вячаслаў Барок таксама заклікаў вернікаў маліцца за аднаўленне касцёла св. Антонія на Рынкавай плошчы ў гістарычным цэнтры Віцебска. Касцёл быў разбураны ў сярэдзіне ХХ ст.

Падчас Імшы адбылося адбылося асвячэнне “хлябоў святога Антонія”.

Пасля літургіі адбыўся вясёлы конкурс на лепшы “хлеб святога Антонія”, спечаны вернікамі, а затым святочная праграма, прысвечаная жыццядзейнасці святога.

Ігар Красоўскі