Каментарый да літургіі
Сёння мы перажываем вялікі дзень, непаўторную радасць, што Бог прамовіў праз свайго Сына. Мы прыйшлі, каб пачуць Яго голас, каб забраць Яго дадому, у сваё сэрца. Гэтае маленькае дзіця з’яўляецца вечным Словам, Богам і Валадаром усяго свету. Няхай радасць з Божага Нараджэння напоўніць нашыя сэрцы. Няхай гэтая ахвяра будзе знакам таго, што Ён прыходзіць да сваіх, а свае Яго прымаюць як Бога, Збаўцу і Караля.
Каментарый да літургіі слова
Сын Божы - вечнае Слова - стаў чалавекам, каб людзі сталі сынамі Бога. Хрыстус з'яўляецца канчатковым Словам Бога да людзей і Збаўцам. Хто слухае Хрыста, становіцца Божай святыняй. Ён падобны да святыні на Сіёне, у якую вяртаецца Пан, як гаворыць прарок Ісая. Таму паслухаем словы Хрыста, якія даюць нам збаўленне і маюць уладу перамяніць нашае жыццё.
Малітва вернікаў
Богу, які стаўся Чалавекам дзеля нашага збаўлення, узнясём нашыя просьбы:
1. Молімся за святы Касцёл ва ўсім свеце, каб мог усюды ў сакрамэнтальных знаках абвяшчаць прыйсце Бога да чалавека. Цябе просім…
2. Молімся аб трывалым супакоі для свету, каб перамагло дабро, праўда і справядлівасць. Цябе просім…
3. Молімся за за ўсіх бяздомных, адзінокіх і бедных, каб знайшлі суседзяў, якія адкрыюць свае сэрцы і дамы. Цябе просім…
4. Молімся за хворых, каб атрымалі ласку здароўя і ў поўнай меры ўдзельнічалі ў радасці, якую прыносіць Збаўца. Цябе просім…
5. Молімся за памерлых, каб атрымалі радасць жыцця вечнага ў небе. Цябе просім...
6. Молімся за нас, сабраных ля алтара Пана, каб мы сталі дзецьмі Бога, якія паверылі, што нарадзіліся ад Бога. Цябе просім…
Божа, Ты - нашае жыццё. Ты з любові да людзей і дзеля нашага збаўлення даў нам Слова Прадвечнае, якое сталася Целам. Пачуй і выслухай нашыя малітвы, якія мы да цябе заносім. Праз Хрыста, Пана нашага.