Вечарам 6 ліпеня ў парафіяльным касцёле ў Квасоўцы (Гродзенская дыяцэзiя) адбылася святая Імша за кс. Яна Занеўскага ў 30-ы дзень ягонага адыходу да Пана.
Імшу ўзначаліў дапаможны біскуп Гродзенскай дыяцэзіі Юзаф Станеўскі. Удзел у ёй таксама прынялі святары дэканата Гродна–захад, святары з сям'і Занеўскіх - кс. Юзаф Занеўскі SDB, кс. Марэк Занеўскі, парафіяне і знаёмыя кс. Яна.
"Чалавечае жыццё перад Панам вымяраецца не гадамі, але ўчынкамі, поўнымі любові, і немагчыма абараніцца ад смерці ці хваробы праз слёзы смутку - толькі праз радасць дапамогчы іншым даведацца пра Пана. А гэтага ў святарскім жыцці ксяндза Яна было шмат, дастаткова, каб стаць перад Панам без страху. Вось чаму дзякуем за сына, брата і святара і молімся за хрысціяніна: "Вечны супакой дай яму, Пане", - сказаў у гаміліі біскуп Юзаф Станеўскі.
На заканчэнне літургіі новы пробашч парафіі кс. Тадэвуш Крыштопік падзякаваў усім за малітву і салідарнасць.
Ксёндз Ян Занеўскі адышоў у вечнасць 6 чэрвеня. Урачыстасці яго пахавання адбыліся 10 чэрвеня ў парафіі Беззаганнага Зачацця Найсвяцейшай Панны Марыі ў Квасоўцы.
Кс. Ян Рaдзюк (АлГ)
