Сёння ўспамін св. Мікалая. Не забудзьце падараваць радасць сваім бліжнім

Каляндар

06.12.2010 13:22

Сёння, 6 снежня, Каталіцкі Касцёл адзначае ўспамін святога Мікалая, біскупа. Святы Мікалай з’яўляецца апекуном Расіі і адным з найбольш папулярных святых на Захадзе, дзе стаў правобразам славутага Санта Клаўса. У многіх каталіцкіх краінах існуе звычай у гэты дзень рабіць дзецям падарункі, як чыніў гэта святы Мікалай. Атрымаць падарунак будуць рады і дарослыя, а кожны можа паспрабаваць стаць святым Мікалаем для свайго бліжняга, хаця б у гэты дзень. Нагадаем, што можна далучыцца да акцыі «Святы Мікалай ідзе да дзяцей», якую ў другі раз праводзіць валанцёрскі рух св. Мікалая ў Віцебску. Згодна з ідэяй акцыі, кожны чалавек можа на нейкі час стаць святым Мікалаем і падрыхтаваць падарунак для пэўнага дзіцяці з дзіцячага дома альбо з небагатай сям’і. Найбольшую славу святому Мікалаю прынеслі яго незвычайная дабрыня і гатоўнасць заўсёды прыйсці на дапамогу бліжнім. Паводле легенды, аднойчы Мікалай паціху падкінуў грошы тром маладым дзяўчатам, якіх збяднелы бацька хацеў аддаць у публічны дом, каб яны не памерлі з голаду. Дзякуючы дапамозе біскупа дзяўчатам удалося захаваць чыстасць і добра выйсці замуж. Мікалай вызваліў трох юнакоў, якіх гаспадар заезду, дзе тыя спыніліся, хацеў забіць і закатаць у бочку.