Вярхоўны архіепіскап Кіева-Галіцкі Святаслаў Шаўчук, кіраўнік Украінскай Грэка-Каталіцкай Царквы, публічна падзякаваў біскупам, духавенству і вернікам Каталіцкага Касцёла ў Беларусі за малітоўную салідарнасць і падтрымку.

У нядзелю 23 лютага архіепіскап Святаслаў Шаўчук узначаліў Боскую Літургію ва ўкраінскім грэка-каталіцкім  саборы Святой Сафіі ў Рыме, якую саслужылі Уладыка Гліб Лончына з Лондана, Апостальскі візітатар для грэка-католікаў Беларусі архімандрыт Сяргей Гаек і ўкраінскае грэка-каталіцкае духавенства з наваколляў Рыма. У літургіі, якая была сумеснай малітвай за Украіну, за мір і справядлівасць, а таксама за супакой бязвінна загінуўшых Кіеўскага Майдана, удзельнічалі некалькі соцень украінскіх грэка-католікаў і група італьянскіх рыма-католікаў.

Напрыканцы літургіі архіепіскап Святаслаў Шаўчук перадаў архімандрыту Сяргею Гаеку словы падзякі іерархам, духавенству і вернікам Каталіцкага Касцёла ў Беларусі за падтрымку і малітоўную салідарнасць у рамках агульнабеларускага Дня посту і малітвы за Украіну, які абвясціла Канферэнцыя Каталіцкіх Біскупаў Беларусі.

“Гэта вельмі каштоўны знак духоўнай салідарнасці і братэрскай падтрымкі для нас ва Украіне з боку братоў католікаў у Беларусі. І мы вам за гэта вельмі ўдзячныя,” – сказаў кіраўнік Украінскай Грэка-Каталіцкай Царквы.

(AG)