7 снежня ў санктуарыі Маці Божай Шкаплернай у Гудагаі Мітрапаліт Мінска-Магілёўскі арцыбіскуп Тадэвуш Кандрусевіч цэлебраваў святую Імшу падзякі за 25 гадоў біскупскага служэння.

Арцыпастыр абраў гэтае месца таму, што менавіта там, перад цудатворным абразом Маці Божай Шкаплернай, 25 ліпеня 1989 г. быў агучаны намінацыйны дэкрэт Папы Яна Паўла ІІ, у адпаведнасці з якім кс. Тадэвуш Кандрусевіч быў прызначаны першым пасля многіх гадоў біскупам Каталіцкага Касцёла ў Беларусі.

Напярэдадні, 6 снежня, Мітрапаліт у межах адвэнтавых рэкалекцый сустрэўся ў Гудагаі з моладдзю. У сяброўскай атмасферы пры гарбаце іерарх падзяліўся з маладымі вернікамі сваімі думкамі на тэму радаснага чакання прыйсця Хрыста.

Між іншым, Мітрапаліт адзначыў падчас сустрэчы, што чаканнем пазначана ўсё жыццё чалавека: дзіця чакае, калі падрасце, потым – калі пойдзе ў школу, потым – калі яе скончыць, затым – калі стане дарослым і незалежным, і г. д. Такім чынам, па словах іерархa, усё жыццё з’яўляецца нібы непарыўным чаканнем – Адвэнтам.

А. Казімір Мараўскі OCD

(AG)