Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Мітрапаліт Тадэвуш Кандрусевіч у ходзе візіту ў Бабруйск абмеркаваў пытанне аб будынку, узведзеным перад мясцовым касцёлам
Беларусь - Мінска-Магілёўская архідыяцэзія
25.03.2014 13:42

Раніцай 25 сакавіка, у дзень, калі Каталіцкі Касцёл адзначае Звеставанне Пана, Мітрапаліт Мінска-Магілёўскі арцыбіскуп Тадэвуш Кандрусевіч наведаў Бабруйск, дзе сустрэўся са старшынёй гарвыканкама Дзмітрыем Банохавым. Бакі абмеркавалі пытанне аб пяціпавярховым будынку, які ў савецкія часы, у 1968 г., быў узведзены перад мясцовым касцёлам Беззаганнага Зачацця Найсвяцейшай Панны Марыі.

Пры ўзвядзенні будынку была разбурана вежа касцёла. Будынак захіляе неагатычны фасад святыні, а таксама перашкаджае ў правядзенні набажэнстваў, бо людзі ходзяць перад касцёльнымі дзвярыма, іх размовы чуваць у касцёле, і г.д.

Правапераемнік гэтага будынку – арганізацыя Міністэрства архітэктуры і будаўніцтва РБ ААТ “БобруйскСтройКомплект” – выстаўляе яго на аўкцыён. Касцёл не згодны з такой пазіцыяй і лічыць, што будынак нельга прадаваць, бо гэта не вырашыць праблемы адкрыцця фасаду касцёла, які прадстаўляе сабой гістарычную і культурную каштоўнасць, і нармальнага функцыянавання парафіі. Сёння, нарэшце, з’явілася магчымасць вярнуць гораду самы прыгожы будынак — касцёл — і гэтым уратаваць хаця б частку яго спадчыны. Касцёл не ўзводзіў будынку, таму неабходна знайсці адпаведны спосаб яго зносу. Горад таксама зацікаўлены ў адкрыцці фасаду касцёла, але ўсё гэта абумоўлена зносам будынку.

Старшыня Бабруйскага гарвыканкама Дзмітрый Банохаў выступіў з прапановай плану, які, на думку Касцёла, мог бы дапамагчы справе, аднак многае будзе залежаць ад пазіцыі Міністэрства архітэктуры і будаўніцтва. Мітрапаліт Тадэвуш Кандрусевіч заклікае маліцца ў інтэнцыі вырашэння гэтай старой і набалеўшай праблемы.

(AG)

 

Пры выкарыстанні матэрыялаў сайта спасылка на Catholic.By абавязкова.