“Францішак 1223 — Францішак 2013” – гэтая назва абрана для сёлетняй кампазіцыі, прысвечанай Божаму Нараджэнню, на плошчы св. Пятра ў Ватыкане. Яслі будуць выкананы ў неапалітанскай традыцыі.

Сцэну нараджэння Хрыста будуць аздабляць фігуры шаснаццаці пастухоў вышынёй да 2 метраў. Вопратка пастухоў характэрная для неапалітанскай традыцыі XVIII ст. Акрамя традыцыйных вобразаў, у кампазіцыі будуць выкарыстаны фігуры беднага чалавека, пажылой жанчыны і цыганкі, якая каецца перад Дзіцяткам Езусам. Фонам стане скалістая мясцовасць.

Губернатарат Дзяржавы Ватыкан паведаміў, што сёлета святочная кампазіцыя на плошчы будзе рэалізавана дзякуючы падтрымцы дабрачынцаў, што максімальна зменшыць выдаткі самой Апостальскай Сталіцы.

6 снежня на плошчу св. Пятра прыбудзе з баварскага Вальдмюнхена ёлка вышынёй 25 м, дыяметрам ствала 98 см і вагой 7,2 тоны. Пасля дэмантажу яе драўніна будзе выкарыстана для вытворчасці дробных побытавых прадметаў і цацак.

Паводле беларускай рэдакцыі Ватыканскага радыё

(AG)