У Ватыкане пасля рэканструкцыі адкрываюцца старажытнарымскія могілкі

Дзяржава Ватыкан

12.12.2013 15:29

Могілкі на Via Triumphalis у Ватыкане зноў адкрыюцца для наведвання ў наступным годзе, пасля прац, што доўжыліся два гады і дазволілі аб’яднаць два сектары месцаў пахавання, якія раней існавалі асобна адзін ад аднаго. Могілкі знаходзяцца на паўночна-ўсходняй частцы ватыканскага ўзвышша, займаюць плошчу каля тысячы кв.м. Там знаходзяцца магілы, мазаікі, ляпніна і фрэскі, што датуюцца з І ст. па ІVст. н.э. Працы па рэканструкцыі былі выкананы Аддзелам грэка-рымскіх старажытнасцяў Музеяў Ватыкана і прафінансаваны «Canada Chapter of the Patrons of the Arts» — міжнароднай арганізацыяй дабрачынцаў, якія аказваюць фінансавую дапамогу праектам Музея Ватыкана. Падчас прац была даследаваная цэнтральная частка могілак, у выніку чаго была выяўлена зона, якая прызначалася для крэмацый. Такія зоны рэдка захоўваюцца ў комплексах такога тыпу. Наведвальнікі могілак змогуць убачыць як магілы вядомых рымскіх грамадзян, напрыклад Тыберыя Клаўдыя Аптатуса, імперскага бухгалтара, ці Алкімуса, жывапісца, што ўпрыгожваў сцэну для тэатра ў Пампеях, так і месцы пахаванняў простых жыхароў. Паводле sedmitza.ru (AYU)