«Кола вучняў Ратцынгера» спадзяецца на далейшыя сустрэчы з Папам на пенсіі. Аб гэтым сказаў кіраўнік гуртка кс. Сцяпан Горн у размове з «Munchner Kirchenradio».

Паводле святара, словы якога прыводзіць Ватыканскае радыё, сёлетняя сустрэча кола ўжо запланавана і члены гуртка маюць надзею, што Бэнэдыкт ХVI прыме ў ёй удзел, а калі не ў самой сустрэчы, то прынамсі ў святой Імшы ў Рыме ці ў летняй рэзідэнцыі Пантыфікаў у Кастэль Гандольфа.

Члены «Кола вучняў Ратцынгера» сустракаюцца рэгулярна з 1977 г. У яго ўваходзяць асобы, якія пад кіраўніцтвам Рымскага Пантыфіка на пенсіі пісалі доктарскія дысертацыі або былі яго памочнікамі. Раней, чым кардынал Ёзаф Ратцынгер стаў прэфектам Кангрэгацыі Веравучэння, тэолагі сустракаліся раз у месяц. Зараз семінары праводзяцца раз у год. Падчас сустрэч навукоўцы абмяркоўваюць розныя пытанні. Апошняя з іх была прысвечана Другому Ватыканскаму Сабору і новай евангелізацыі.

(AG)