Прынятае Генеральным сінодам Царквы Англіі рашэнне аб узвядзенні ў епіскапы жанчын стане яшчэ адной перашкодай у экуменічным дыялогу англікан з праваслаўнымі і католікамі, заявілі РИА Новости прадстаўнікі Рускай Праваслаўнай Царквы і Каталіцкага Касцёла.

Каментуючы прынятае рашэнне, былы кіраўнік патрыяршай прэс-службы, настаяцель храма пакутніцы Таццяны пры МДУ протаіерэй Уладзімір Вігілянскі нагадаў, што «на Апошняй Вячэры вакол Хрыста сабраліся апосталы-мужчыны, тыя, хто павінен несці ў сабе вобраз Хрыста на галоўнай службе — Эўхарыстыі». Святар дадаў, што праваслаўныя хрысціяне зыходзяць з таго, што «тыя, хто чыніць сакрамэнт Эўхарыстыі, увасабляюць сабой Хрыста», таму імі павінны быць мужчыны. «Аднак апостальскае служэнне жанчын ніхто не адмяняў, у нас у гісторыі Царквы шмат роўнаапостальных жанчын, іх святыя імёны агульнавядомыя», — адзначыў прадстаўнік РПЦ.

«Рашэнне Генеральнага сіноду Царквы Англіі аб пасвячэнні жанчын у епіскапы значна ўскладніць міжхрысціянскі дыялог», — заявіў у аўторак Генеральны сакратар Канферэнцыі Каталіцкіх Біскупаў Расіі кс. Ігар Кавалеўскі. Ён нагадаў, што Каталіцкі Касцёл не дапускае пасвячэння жанчын у святарскі і біскупскі сан. «Жанчыны ў Касцёле займаюць годнае месца, аднак гэта ніяк не звязана з іх пасвячэннем», — адзначыў святар. Паводле яго слоў, католікі вядуць пастаянны і плённы дыялог пра служэнне жанчын, падкрэсліваючы іх асаблівую годнасць і вялікую місію ў хрысціянстве.

Рашэнне аб пасвячэнні жанчын у епіскапы падтрымалі цяперашні кіраўнік Царквы Англіі архіепіскап Кентэрберыйскі Джасцін Уэлбі і прэм'ер-міністр Вялікабрытаніі Дэвід Кэмеран, які сказаў у парламенце, што пасля гэтага рашэння Царква Англіі будзе «Царквой сучаснай, сугучнай грамадству».

Нягледзячы на тое, што прынятае рашэнне мае патрэбу ў зацвярджэнні брытанскім парламентам і каралевай Вялікабрытаніі Елізаветай II, якая з'яўляецца кіраўніком Царквы Англіі, эксперты выказваюць упэўненасць, што яно будзе падтрымана, і на сваім наступным пасяджэнні 17 лістапада 2014. Сінод ўрачыста абвесціць магчымасць пасвячэння жанчын у епіскапы.

Пасвячэнне жанчын у святары практыкуецца ў англікан з пачатку 1990-х гадоў, і да цяперашняга часу яны складаюць адну трэць кліру Царквы Англіі. Жанчыны ўжо нясуць епіскапскае служэнне ў іншых Англіканскіх Цэрквах, у прыватнасці — у ЗША, Канадзе, Новай Зеландыі, Аўстраліі, Ірландыі і Уэльсе.