24 студзеня Каталіцкі Касцёл адзначае ўспамін св. Францішка Сальскага, біскупа і доктара Касцёла. У 1923 г. гэты святы быў абвешчаны апекуном каталіцкай прэсы. 

На сённяшні дзень у Беларусі выдаюцца пяць часопісаў: «Дыялог», «Маленькі рыцар Беззаганнай», «Наша вера», «Ave Maria» і чатыры газеты: «Каталіцкі веснік» (Віцебская дыяцэзія), «Каталіцкія навіны» (Мінска-Магілёўская архідыяцэзія), «Слова жыцця» (Гродзенская дыяцэзія), «Царква» (Беларуская Грэка-Каталіцкая Царква). Існуе інтэрнэт-партал пры епіскапаце Беларусі, а таксама ідзе праца па стварэнні ў Беларусі «Радыё Марыя».

У дзень нябеснага апекуна журналістаў каталіцкіх СМІ калектыў Catholic.by шчыра віншуе сваіх калег і жадае натхнення і крэатыўнасці ў штодзённай працы! Няхай праз вашу дзейнасць і творчасць як мага больш людзей спазнаюць Хрыста.

Святы Францішак нарадзіўся ў 1567 г. З дзяцінства атрымліваў глыбока каталіцкае выхаванне і добрую адукацыю. Пазней у Парыжы Францішак вывучаў тэалогію, а ў Падуі (Італія) — кананічнае і грамадзянскае права.

Перажыўшы ў пэўны момант крызіс веры і задаючы сабе пытанні аб мэце жыцця, Францішак адчуў пакліканне да святарства. Святарскае пасвячэнне ён прыняў у 1593 г. Праз некалькі гадоў стаў біскупам Жэневы, дзе ў той час актыўна дзейнічалі кальвіністы. Францішак Сальскі з адвагай ажыццяўляў дыялог з пратэстантамі, беручы ўдзел у дыпламатычных місіях Касцёла.

Разам са св. Жаннай дэ Шанталь св. Францішак Сальскі заснаваў жаночы закон Адведзінаў Найсвяцейшай Панны Марыі, для якога быў характэрны асаблівы дух сузірання.

Кананізавалі Францішка Сальскага ў 1665 г., а ў 1877 г. папа Пій ІХ абвясціў яго доктарам Касцёла.