З 15 па 25 жніўня 2011 г. для маладых католікаў з Віцебскай дыяцэзіі праходзілі сустрэчы з польскай моладдзю. Яны былі арганізаваны на тэрыторыі Рэспублікі Польшча пад патранажам Фонду «АVE», ураду Варшавы і Міністэрства адукацыі Польшчы. Паездка ў суседнюю краіну пакінула незабыўны след у сэрцах і душах нашых юнакоў і дзяўчат.

Праграма сустрэч уключала ў сябе як адукацыйныя, так і спартыўныя і культурныя мерапрыемствы. Першае знаёмства 22 маладых вернікаў Прыдзвінскага краю з польскімі равеснікамі адбылося падчас трохдзённага заплыву на байдарках неўзабаве пасля перасячэння мяжы. Асаблівая ж увага была нададзена пытанням валанцёрскай дзейнасці, якія маладыя людзі абедзвюх краін паспяхова і мэтанакіравана абмяркоўвалі падчас знаходжання ў Варшаве.

Сумесныя навучальныя заняткі садзейнічалі ўзаемапазнанню культур удзельнікаў, абмену досведам практычнай працы з людзьмі, усталяванню сяброўскіх адносінаў і кантактаў гасцей і гаспадароў на прыватным узроўні. Чаму ў немалой ступені спрыялі цудоўныя побытавыя ўмовы прабывання, а таксама гасціннасць і добразычлівасць арганізатараў.