17 мая ў Лучайскім касцёле адбыўся адпуст у памяць святога Андрэя Баболі, апекуна парафіі святога Тадэвуша і ўвогуле ўсёй Беларусі.

Пасля адбылася Святая Імша, адной з інтэнцый якой быў супакой душы для Ганны Дубовік у 20 гадавіну смерці. Гэта спачылая парафіянка, якая для многіх была прыкладам нязломнай веры. У гады бязбожнага ліхалецця гэта жанчына навучала дзетак катэхезе, падтрымлівала святароў, сасланых у Сібір. Пасля стала манахіняй і прыняла імя сястры Міхаэлі.

Святочную гамілію прамовіў пробашч з Мосара кс. Марат Казлоўскі, які пры бежмаванні выбраў сабе заступніка Андрэя Баболю. Пра яго святар сказаў: «Святы, які не патрабуе рэкламы. Даведаўшыся пра яго, нельга не палюбіць святога пакутніка». Называючы Андрэя Баболю «народным місіянерам», «апякуном адзінства» святар заклікаў вернікаў да любові, каб, нягледзячы на розныя рэлігіі, людзі імкнуліся рабіць дабро і любіць бліжняга.

Цудоўным працягам святочнага набажэнства стала Літанія да святога, апекуна сённяшняга дня. А працэсія з Найсвяцейшым Сакрамантам закончыла Літургію.

У Лучайскай святыні знаходзіцца рэліквіярый з часцінкай святога Андрэя Баболі. Усе жадаючыя маглі скласці пашану апекуну парафіі, прыклаўшыся да рэліквіі.

Якім жа цудоўным і нечаканым сюрпрызам стала аб’ява ксяндза пробашча Мікалая Ліпскага пра пілігрымку «Па слядах святога Андрэя Баболі». Усе жадаючыя могуць прыняць удзел у малітоўнай вандроўцы ў Пінск, Лагішын, Янаў Палескі, Нясвіж ужо напрыканцы лета.

Традыцыйнымі канцэртамі заканчваюцца фэсты ў Лучаі. На сёлетняе свята былі запрошаны ўжо вядомыя Лучаю выканаўцы: гурт «Laudans» з Мінску і самабытны музыкант з Шаркаўшчынскай парафіі спадар Чэслаў Рачыцкі. Змяняючы адзін аднаго, музыкі выконвалі розныя кампазіцыі са свайго рэпертуару. Прыгадаць маладосць пад паненскі вальс, польку, факстрот і іншыя творы ў выкананні спадара Чэслава давялося слухачам паважанага ўзросту. А вось выступленне саліста Андрэя Лугіна было накіравана на маладзейшую аўдыторыю. Нават атрымаўся імправізаваны выступ гурта «Laudans» з лучайскай іпастаўскай моладдзю.

На заканчэнне свята ксёндз пробашч падзякаваў артыстам і ўсім прысутным за ўдзел і запрасіў на наступныя: Свята сем’яў (29 чэрвеня) і парафіяльны адпуст св. Ганны (26 ліпеня).

Лена Клімза-Колтан,

Фота Юзафа Цапеліка

Паводле luchai.by