7 лістапада ў віцебскім касцёле святой Барбары ўрачыста распачалося святкаванне юбілею Ордэну братоў прапаведнікаў, заснаванага святым Дамінікам у 1216 годзе.

Юбілейны год будзе адзначацца з 7 лістапада 2015 года да 21 студзеня 2017 года, святкаванне супадае з аб’яўленым Папам Францішкам надзвычайным Юбілейным годам Божай міласэрнасці.

Разам з айцамі дамініканамі, якія служаць у парафіі Святой Барбары, на ўрачыстасць сабраліся прадстаўнікі галінаў Ордэна, якія жывуць і працуюць у Беларусі, з усіх куткоў нашай краіны, а таксама прадстаўніцы Кангрэгацыі Сясцёр святога Дамініка, моладзь дамініканскага душпастырства, госці і парафіяне.

Ордэн братоў прапаведнікаў мае багатую гісторыю, звязаную з беларускімі тэрыторыямі. Існуюць звесткі, што дамінікане з’явіліся на нашых землях ужо ў сярэдзіне XIII стагоддзя, а першы беларускі біскуп Віт быў дамініканінам (падрабязней пра гісторыю дамініканскага Ордэна ў Беларусі можна прачытаць у №2 часопіса «Наша вера» за 2015 год). Дамінікане працуюць у Беларусі амаль з самага заснавання Ордэна, і гэты юбілей мае для нас вялікае значэнне.

Генерал Ордэна айцец Бруна Кадорэ ў Лісце на распачацце юбілейнага года заклікаў усіх яго прадстаўнікоў да святкавання і звярнуў увагу, што «шчаслівы збег акалічнасцяў дазваляе нам спалучыць святкаванне дамініканскага юбілею з юбілеем Касцёла, бо вестуны Евангелля — гэта вестуны ласкі Божай, а вестуны ласкі абвяшчаюць Божую міласэрнасць».

Святкаванне ў Віцебску пачалося ўрачыстай працэсіяй і запальваннем юбілейнай свечкі як сімвала евангельскага святла, якое прадстаўнікі Ордэна павінны несці ў свет. Святую Імшу цэлебраваў біскуп Віцебскі Алег Буткевіч, а на заканчэнне прагучаў старажытны гімн у гонар Маці Божай «Salve Regina».

Ганаровы госць, вядомы польскі лютніст Антоній Пільх даў у касцёле кароткі канцэрт пасля ўрачыстай Імшы, а спецыяльна запрошаная на ўрачыстасць беларускі навуковец, гісторык Раіса Зянюк, якая прысвяціла некалькі сваіх працаў і публікацый дзейнасці дамініканскага Ордэна ў Беларусі, распавяла прысутным пра гісторыю Ордэна прапаведнікаў на нашых землях і яго значэнне для беларускага хрысціянства.

Святкаванне Юбілейнага года заснавання дамініканскага Ордэна будзе працягвацца шэрагам сустрэч і ўрачыстых мерапрыемстваў ва ўсім свеце.

Падчас юбілею з дазволу Папы Францішка можна атрымаць поўны адпуст, які можна ахвяраваць за сябе або за душы памерлых. Для гэтага трэба выканаць наступныя ўмовы:

• Быць у стане асвячальнай ласкі, якая атрымліваецца праз споведзь
• Удзельнічаць у Эўхарыстыі і прыняць святую Камунію
• Памаліцца ў інтэнцыях Святога Айца
• Пабожна далучыцца да святкавання юбілейных урачыстасцяў
• Наведаць дамініканскі касцёл або капліцу, дзе правесці некаторы час у разважанні перад Найсвяцейшым Сакрамэнтам, завяршыць разважанне малітвамі «Ойча наш», «Веру ў Бога», юбілейнай малітвай і малітвай закліку да апекі Маці Божай (напрыклад, «Тваёй абароне»).

Юбілейная малітва
Божа, Ойча міласэрнасці, Ты паклікаў святога Дамініка, каб ён стаў поўным веры вандроўным прапаведнікам і вестуном ласкі, улі ў нас Духа Уваскрослага Хрыста, каб мы верна і радасна абвяшчалі Евангелле супакою. Праз Хрыста, Пана нашага. Амэн.

Юлія Шэдзько, фота Антона Паплёўкі

(АлГ)