У парафіі Беззаганнага Зачацця Найсвяцейшай Панны Марыі і св. Антонія Падуанскага ў Паставах адбылася сустрэча моладзі Віцебскай дыяцэзіі. Мерапрыемства пачалося ўвечары 23 красавіка і працягвалася да раніцы наступнага дня.
На сустрэчу сабралася моладзь з Паставаў, Глыбокага, Варапаева, Мёраў, іншых гарадоў і вёсак Віцебшчыны.
Прадстаўнікі моладзі адзначалі важнасць такіх сустрэч, дзе можна разам сабрацца, каб памаліцца, проста паразмаўляць адзін з адным, бо, калі разам збіраецца шмат маладых вернікаў, каб разам пазнаваць Бога, то адчуваецца еднасць усяго Касцёла і ёсць упэўненасць, што Касцёл мае будучыню.
Пра важнасць веры для маладога чалавека вельмі добра сказала Святлана Пяткоўская з Варапаева, якая падзялілася прачытаным выказваннем аднаго мудрага чалавека: «Чалавек, які прыходзіць да Бога ў старасці, ратуе сваю душу, а той, хто прыходзіць у маладосці, ратуе сваё жыццё».
На сустрэчы прысутнічаў біскуп Віцебскай дыяцэзіі Алег Буткевіч. Іерарх узначаліў святую Імшу, якая пачалася ў 23 гадзіны ў пастаўскім касцёле. Звяртаючыся да моладзі, ардынарый дыяцэзіі паразважаў на тэму Божай міласэрнасці і важнасці веры для фармавання хрысціянскага светапогляду.
«Мы атрымліваем дар Божай міласэрнасці, калі проста адкрываемся на яго. І вось тут нам патрэбна малітва, нашая асабіста, іншага чалавека, каб мы маглі гэты дар прыняць», – сказаў іерарх, адзначыўшы, што, каб прыняць гэты дар, трэба паглыбляць сваю веру, пазнаваць сутнасць Бога.
Біскуп Алег Буткевіч нагадаў, што адна з мэтаў гэтай сустрэчы — падрыхтоўка да Сусветных дзён моладзі, якія пройдуць у ліпені ў Кракаве.
Ксёндз Аляксей Асон паведаміў, што гатоўнасць арганізавана паехаць на Дні моладзі выказалі ўжо больш за 60 чалавек. Акрамя гэтага, шмат хто паедзе ў Кракаў самастойна.
Малітоўнае чуванне моладзі працягвалася ўсю ноч. Адметнасць сустрэчы была ў тым, што ў гэты ж час падобнае мерапрыемства праходзіла ў Апостальскай Сталіцы на плошчы святога Пятра, дзе з моладдзю сустракаўся Папа Францішак. Гэтая еднасць каталіцкай моладзі ўсяго свету адчувалася і на Віцебшчыне, у Паставах.
Салідарнасць і адзінства Каталіцкага Касцёла адчувалася нават у тым, што ў Рыме маладыя людзі мелі магчымасць атрымаць прабачэнне грахоў ад Папы Францішка, а ў Паставах можна было паспавядацца ў біскупа Алега Буткевіча. Як адзначыў арганізатар дыяцэзіяльнай сустрэчы ксёндз Аляксей Асон, пакуль у Касцёл свядома прыходзяць маладыя людзі, то ў яго ёсць будучыня — як у Беларусі, так і ва ўсім свеце.
У парафіі Беззаганнага Зачацця Найсвяцейшай Панны Марыі і св. Антонія Падуанскага ў Паставах адбылася сустрэча моладзі Віцебскай дыяцэзіі. Мерапрыемства пачалося ўвечары 23 красавіка і працягвалася да раніцы наступнага дня.
для друку
