Кангрэгацыя Божага Культу і Дысцыпліны Сакрамэнтаў падрыхтуе падручнік, які дапаможа святарам правільным чынам цэлебраваць святую Імшу, а вернікам — лепш удзельнічаць у ёй. Аб гэтым паведаміў прэфект ведамства кардынал Антоніо Канісарэс Лавэра.

Па словах іерарха, падручнік можа выйсці ужо летам бягучага года.

У сваім дакладзе «Каталіцкая літургія з часоў Другога Ватыканскага Сабору», прамоўленым 16 студзеня ў сядзібе пасольства Іспаніі ў Апостальскай Сталіцы, кардынал адзначыў, што аднаўленне літургіі павінна адбывацца ў сувязі з усёй традыцыяй Касцёла, а не ў адрыве ад яе. Узгадваючы пра саборную Канстытуцыю аб літургіі «Sacrosanctum Concilium», прэфект кангрэгацыі падкрэсліў, што мэта літургіі — адданне хвалы Богу і збаўленне людзей. Іерарх сказаў і пра значэнне хвілін цішыні, калі кожны ўдзельнік набажэнства можа размаўляць з Хрыстом. Правільнай паставай падчас літургіі, па словах кардынала, з’яўляецца тая, пра якую казаў Ян Хрысціцель: «Трэба, каб Ён узрастаў, а я памяншаўся».

Кардынал крытычна паставіўся да спробаў упрыгожвання святой Імшы вясёлымі песнямі, якія быццам бы разганяюць «сум» літургіі, замест таго, каб засяродзіцца на яе таямніцы.

Удзельнікі Імшы, па словах прадстаўніка Апостальскай Сталіцы, павінны засяродзіць увагу на Хрысце, які прысутнічае ў алтары, скіраваным на ўсход. Таму кардынал назваў памылковым змяшчэнне Найсвяцейшага Сакрамэнту ў бакавой капліцы. Няправільнымі іерарх лічыць таксама размовы вернікаў перад літургіяй і недастатковую падрыхтоўку да яе.

(AG)