Пашырэннем беднасці і недахопам бяспекі ў палітычнай, эканамічнай і грамадскай сферах занепакоены епіскапат Гаіці. «Мы павінны прыняць святло Эмануэля, каб аднавіць спадчыну Касцёла і ўсёй краіны, знішчаную катастрофамі апошніх трох гадоў», — да такой высновы прыйшлі іерархі падчас свайго пасяджэння.

Біскупы адзначаюць, што ў гэтым годзе, які падыходзіць да завяршэння, насталі некаторыя пазітыўныя змены, аднак прызнаюць, што рост беспрацоўя і беднасці можа лёгка знішчыць гэты прагрэс.

Па інфармацыі польскай рэдакцыі Ватыканскага радыё, іерархі Гаіці выказалі заклапочанасць таксама з прычыны наступаючай дэградацыі грамадскага жыцця і знішчэння прыроднага асяроддзя, упадку пашаны да каштоўнасцяў і заняпаду інфраструктур. Таму перад Божым Нараджэннем біскупы заклікаюць сваіх суайчыннікаў вярнуцца на Божы шлях праз «веру, талерантнасць і супрацоўніцтва».

(AG)