Касцёл у Бразіліі моліцца за ахвяр пажару, які адбыўся на дыскатэцы ў Санта-Марыя 27 студзеня. У трагедыі загінуў 231 чалавек, некалькі дзясяткаў было паранена.

Як паведамляе польская рэдакцыя Ватыканскага радыё, блізкасць сем’ям, якія аплакваюць гібель сваіх родных, выказаў старшыня бразільскага епіскапату кардынал Раймунду Ассіс. Кардынал выказаў салідарнасць і арцыбіскупу ў Санта-Марыя Хеліа Руперту, які таксама звярнуўся да ўсіх, каго закранула трагедыя, са словамі падтрымкі. Арцыбіскуп заклікаў іх «глядзець на Езуса Хрыста, крыніцу жыцця і нашага Збаўцу», і паабяцаў маліцца за памерлых, іх сем’і і ўсё грамадства.

Словы спачування скіраваў арцыбіскуп Сан-Паулу кардынал Адзіліу Шэрэр, дадаўшы, што «трагедыя стала вынікам многіх памылак і занядбанняў, якіх можна было б пазбегнуць, калі б былі захаваны ўмовы бяспекі».

«Прагну суцешыць кожнага бацьку і кожную маці і сказаць, што боль, які зараз ёсць іх удзелам, сапраўды цяжка перамагчы. (…) Церпім разам з вамі. У Хрысце маем надзею на жыццё, якое не заканчваецца з хвілінай смерці», — напісаў арцыбіскуп Арані Тэмпеста.

У Бразіліі праходзяць набажэнствы за ахвяр трагедыі. Спачуванні ўсім, каго яна закранула, выказаў таксама Святы Айцец.

(AG)