Вернікі, якія прыбылі на штогадовыя ўрачыстасці ў Будслаў, што праходзяць сёлета пад дэвізам “Марыя – прытулак грэшных”, сабраліся 3 ліпеня на святой Імшы для пілігрымаў. Эўхарыстыю ўзначаліў дапаможны біскуп Гродзенскай дыяцэзіі Юзаф Станеўскі.

Імшу канцэлебравалі біскуп Віцебскі Алег Буткевіч, дапаможны біскуп Мінска-Магілёўскай архідыяцэзіі Аляксандр Яшэўскі SDB, Апостальскі візітатар для грэка-католікаў Беларусі архімандрыт Сяргей Гаек, шматлікія святары.

На пачатку Імшы да сабраных звярнуўся Мітрапаліт Мінска-Магілёўскі арцыбіскуп Тадэвуш Кандрусевіч, прывітаўшы святароў, кансэкраваных асобаў і вернікаў, якія прыбылі ў Будслаў. Асаблівым чынам арцыпастыр прывітаў таксама новага біскупа – Аляксандра Яшэўскага, сказаўшы яму: “Мы молімся да Маці Божай аб Вашым доўгім і плённым служэнні ў Беларусі”.

Арцыбіскуп Тадэвуш Кандрусевіч прывітаў усіх пілігрымаў, асабліва з Брэста, якія “прайшлі доўгі і нялёгкі шлях” у Будслаў, падзякаваўшы ім за ахвярнасць; пілігрымаў з Віцебскай дыяцэзіі, якія “прыносяць у Будслаў свой асаблівы віцебскі каларыт”; з Гродзенскай дыяцэзіі, у тым ліку з Ліды і Гродна; з Мінска-Магілёўскай архідыяцэзіі. Іерарх прывітаў і пілігрымку, якая прыйшла ў санктуарый у гэтым годзе ўпершыню, – пілігрымку сем’яў, падкрэсліўшы, што “сям’я – падмурак грамадства”. “Дзякуй за тое, што захацелі прыйсці да гэтага сэрца нашага Касцёла ў Беларусі – у Будслаўскі санктуарый, каб прадставіць Маці Божай свае просьбы і спадзяванні”, – сказаў Мітрапаліт.

Таксама арцыпастыр заахвоціў вернікаў прыступіць падчас урачыстасцяў да сакрамэнту пакаяння, “каб гэты будслаўскі фэст стаў часам ачышчэння нашых сэрцаў”. Арцыбіскуп падзякаваў святарам і ўсім, хто паспрыяў прыбыццю шматлікіх пілігрымаў у Нацыянальны санктуарый.

Мітрапаліт нагадаў, што ў гэтым годзе адзначаецца юбілей адраджэння пілігрымак у Будслаў, якія аднавіліся ў 1990 г. пасля доўгіх дзесяцігоддзяў ганенняў на Касцёл. “Мы дзякуем за гэта Богу, бо гэта цуд, які Ён стварыў”, – сказаў арцыбіскуп і заклікаў прысутных “маліцца аб тым, каб Бог учыніў таксама цуд нашага навяртання”.

Біскуп Юзаф Станеўскі ў гаміліі звярнуў увагу, што сённяшні свет заклкіае да камунікацыі, “некаторыя сродкі інфармацыі мы шырока ўжываем у жыцці”. Але адначасова, дадаў іерарх, “людзі сталі менш сустракацца”, “не давяраюць індывідуальнай сустрэчы”, “нават забыліся аб выразы твару суразмоўцы”. “Сёння мы кажам ім і сабе: “Даверцеся і спазнайце праўду, – адзначыў біскуп. – Існуе ў Беларусі месца сустрэчы чалавека з чалавекам і чалавека з Богам. Гэтым месцам з’яўляецца Будслаў. І мы, пілігрымы, гатовы весці малітоўны дыялог з Маці Езуса Хрыста”.

Іерарх адзначыў, што ў гэтыя дні з усёй Беларусі і з-за мяжы ў Будслаў ішлі пілігрымы, “запрашаючы ўсіх да крыніцы нашай радасці” – Маці Божай. “З вялікай удзячнасцю просім сёння Бога за ўсіх людзей добрай волі, якіх сустрэлі на пілігрымскім шляху”, – сказаў біскуп. Іерарх прывітаў таксама прадстаўнікоў дзяржаўнай улады ўсіх узроўняў, адзначыўшы, што вернікі Касцёла заўсёды просяць у малітве аб ласках для іх.

Біскуп дадаў, што “праз стагоддзі і пакаленні” вернікі нашай зямлі пры сустрэчы з Марыяй у Будславе паўтараюць словы Альжбеты з Евангелля: “Благаслаўлёная Ты…” Іерарх заўважыў, што “можна запытаць сябе: ці належу я да кола гэтых дзвюх жанчын”, для якіх характэрны такія цноты, як, напрыклад, сціпласць, чысціня; “ці належу да людзей, якімі Бог карыстаецца, каб здзейсніць свой план?”.

Іерарх адзначыў таксама важнасць малітвы – “асабістай, шчырай і дабравольнай”, якая “дапамагае распазнаць сябе”, і звярнуў увагу, што “ў жыцці чалавека, які не моліцца, няма месца на сустрэчу, кампраміс, разуменне”.

Біскуп Юзаф Станеўскі заклікаў кожнага “наблізіцца да Маці Божай і праз Яе заступніцтва весці дыялог з Панам”, а затым “перамяніць малітву ў чын”. “Марыя, Маці Хрыста, вядзі нас да Пана!” – звярнуўся іерарх да Панны Марыі.

Анастасія Грышан

Фота Віталія Палінеўскага