Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Конрад Паўлік, пасол Польшчы ў Беларусі: Мая інтэнцыя ў Будславе — аб паспяховых узаемаадносінах нашых краін
Беларусь
01.07.2017 12:18

Нацыянальны санктуарый у Будславе 1 ліпеня наведаў пасол Рэспублікі Польшча ў Беларусі Конрад Паўлік, які прыняў удзел у цэнтральнай святой Імшы.

фота Аляксандры Шчыглінскай

«Я вельмі рады, што магу быць тут у Будславе на штогадовай урачыстасці — найважнейшай для Каталіцкага Касцёла ў Беларусі, — адзначыў пасол. — Мне важна, што Польшча прысутная тут у маёй асобе. У Будслаў прыйшла вялікая колькасць пілігрымаў з усёй Беларусі! З боку пілігрымаў я бачу добры настрой, матывацыю і ахвоту да малітвы. Гэта вельмі ўзрушвае і надае сіл і аптымізму!»

Гаворачы пра 100-годдзе юбілейных урачыстасцей у Фаціме, Конрад Паўлік зазначыў, што гэта важная падзея не толькі для Каталіцкага Касцёла ў Беларусі, але таксама і ў Польшчы.

Фота Ільі Лапато

«Я рады, што маю магчымасць удзельнічаць ва ўрачыстасці разам з беларускімі католікамі», — дадаў ён.

Пасол таксама падкрэсліў, што на 2017 год прыпадае 25-я гадавіна незалежнасці Беларусі, а таксама 25-я гадавіна ўстанаўлення дыпламатычных адносін паміж Беларуссю і Польшчай.

«Гэтая падзея важная для абедзвюх краін і для мяне як пасла гэта адна з галоўных інтэнцый, з якой я прыбываю ў Будслаў, — каб адносіны паміж нашымі краінамі ў бліжэйшыя 25 гадоў развіваліся гэтак жа плённа, як і раней», — заўважыў Конрад Паўлік.

Фота кс. Аляксандра Уласа

Як дадаў пасол, пакуль яму яшчэ не ўдалося паўдзельнічаць у пешай пілігрымцы, але ён спадзяецца на гэта.

«Некалькі разоў з асабістымі інтэнцыямі я наведваў санктуарый у Чэнстахове, але ў пешай пілігрымцы ісці яшчэ не давялося. Я, аднак, спадзяюся, што ў мяне яшчэ ўсё наперадзе. Я думаю, што кожны католік хоць раз у жыцці павінен прайсці ў пешай пілігрымцы ў свой нацыянальны санктуарый».

(cath/il)

 

Пры выкарыстанні матэрыялаў сайта спасылка на Catholic.By абавязкова.