Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Хроніка сустрэчы Папы Францішка і Патрыярха Маскоўскага і ўсяе Русі Кірыла
Беларусь
12.02.2016 11:41

12 лютага на Кубе прайшла гістарычная сустрэча Папы Рымскага Францішка з Патрыярхам Маскоўскім і ўсяе Русі Кірылам. Catholic.by вёў адмысловую хроніку сустрэчы.

Сумесная дэкларацыя Каталіцкага Касцёла і Праваслаўнай Царквы, якую падпісалі Папа Рымскі Францішак і Патрыярх Маскоўскі і ўсяе Русі Кірыл, утрымлівае 10 старонак і 30 параграфаў.

Сярод абмеркаваных тэм — сітуацыя з хрысціянамі на Блізкім Усходзе, становішча хрысціян ва Украіне, становішча грэка-католікаў і праваслаўных, праблема крызісу сем'яў і г.д.

Тэкст дэкларацыі цалкам (на рускай мове) ››

 

 01.10

Самалёт з Папам Францішкам на борце пакінуў гаванскі аэрапорт. Гістарычная сустрэча Пантыфіка і Патрыярха Кірыла паспяхова завяршылася.

 

00.50

Папа Францішак і Патрыярх Кірыл падпісалі сумесную дэкларацыю Каталіцкага Касцёла і Рускай Праваслаўнай Царквы. Выніковы дакумент утрымлівае 30 параграфаў на дзесяці старонках.


 

0.40.

Папа Францішак: У гэтым дыялогу я адчуваў прысутнасць Святога Духа

 

«Мы гаварылі як браты, мы — біскупы, маем тую ж веру, і шукаем адзін шлях. Мы гаварылі вельмі шчыра. Я магу вас запэўніць, у гэтым дыялогу я адчуваў прысутнасць Святога Духа. Я ўдзячны Патрыярху за пакору і намаганні, за тое, што ён паказаў, што мы шукаем адзінства. Мы разам абмеркавалі цэлы шэраг ініцыятыў, якія можна будзе з часам ажыццявіць». 

Пантыфік падзякаваў ураду Кубы за пляцоўку для гістарычнай сустрэч. «Куба можа стаць сталіцай дыялогу», — заключыў Святы Айцец.


00.35

Патрыярх Кірыл: Царква і Касцёл могуць працаваць разам, абараняючы хрысціянства ва ўсім свеце

Патрыярх Маскоўскі і ўсяе Русі Кірыл пасля падпісання дэкларацыі адзначыў:

«Мы правялі дзве гадзіны ў адкрытай брацкай дыскусіі. З поўным разуменнем адказнасці за свае Цэрквы, за сваіх вернікаў, за свае народы будзем будаваць хрысціянства і будаваць чалавечую цывілізацыю.
   
Гэта была змястоўная бяседа, якая дала магчымасць зразумець пазіцыі адзін аднаго. І гэта дало свой плён. Царква і Касцёл могуць актыўна працаваць, абараняючы хрысціянства ва ўсім свеце. Працаваць разам, каб не было вайны, каб паўсюль паважалася чалавечая жыццё і ўмацоўваліся асновы асобы і маралі».
 

 

00.30

Папа Францішак і Патрыярх Кірыл выйшлі да прэсы і сваіх дэлегацый. Падчас гістарычнага падпісання сумеснай дэкларацыі Каталіцкага Касцёла і Рускай Праваслаўнай Царквы іерархі па-сяброўску абняліся.

 

00.26.

Сустрэча Папы Францішка і Патрыярха Кірыла ўсё яшчэ працягваецца. Запланаваныя дзве гадзіны на сустрэчу ўжо мінулі, але іерархі яшчэ працягваюць перамовы і пакуль не выйшлі да прэсы. Чакаецца, што акрамя прадстаўленай сумеснай дэкларацыі яны выступяць з кароткім словам.

 

***12 лютага***

23.44

Першыя відэакадры сустрэчы Папы Францішка з Патрыярхам Кірылам 




23.42

Папа Рымскі Францішак у ходзе сустрэчы з Патрыярхам Маскоўскім і ўсяе Русі Кірылам перадасць у дар праваслаўнаму іерарху рэліквію асветніка славян святога Кірыла і келіх. Святы Кірыл, асветнік славян, пахаваны ў крыпце каталіцкай базылікі святога Клімента.

Як удакладніў кіраўнік Прэс-службы Святога Пасаду а. Фэдэрыко Ламбардзі, гэта кавалачак косці.

Патрыярх Кірыл у сваю чаргу перадасць Папу Францішку спіс іконы Казанскай Божай Маці. Гэтая ікона асаблівым чынам аб’яднала Ватыкан і Рускую Праваслаўную Царкву. Адзін з яе спісаў быў падараваны Папу Яну Паўлу ІІ [паводле агенцтва ТACC, (IL)].


 

23.30

Трансляцыя гуку пратакольнай часткі гутаркі перарывалася па тэхнічных прычынах. Журналісты на месцы не мелі магчымасці пачуць цалкам словы прывітання, якімі іерархі абмяняліся ў самым пачатку.

Аднак, як паведамляе агенцтва ТАСС са спасылкай на агенцтва АНСА, першымі словамі Папы Францішка, звернутымі да Патрыярха Кірыла, былі: «Нарэшце, мы — браты». Патрыярх Кірыл адказаў: «Цяпер усё лягчэй». «Відавочна, што гэта — Божая воля», — сказаў Пантыфік.


23.20

Першыя афіцыйныя фотаздымкі сустрэчы ў кубінскай Гаване


 

23.05

Трывае размова Папы Францішка і Патрыярха Кірыла «за зачыненымі дзвярыма». Чакаецца, што сустрэча будзе доўжыцца каля дзвюх гадзін.

Папа Рымскі і Патрыярх вядуць перамовы на родных мовах (рускай і іспанскай) пры дапамозе двух перакладчыкаў. Адзін з іх — літоўскі святар Вісвалдас Кулбокас. Ён знаходзіцца на дыпламатычнай службе ў Ватыкане і ўжо вядомы працай перакладчыка на сустрэчы Пантыфіка з Прэзідэнтам Расіі Уладзімірам Пуціным у чэрвені 2015 года.

 

22. 40

«Мы сустракаемся ў патрэбным месцы і ў патрэбны час»

Вытрымкі з 10-хвіліннай размовы Папы Францішка і Патрыярха Маскоўскага і ўсяе Русі Кірыла (відэатрансляцыя сустрэчы іерархаў, дзе змаглі прысутнічаць журналісты, доўжылася абмежаваны час, пазней відэатрансляцыя адновіць сваю работу).

Папа Францішак: «Дзякую Богу, што наша сустрэча адбываецца».



Патрыярх Кірыл: «Адлегласць не стала перашкодай для сустрэчы. Мы маглі сустрэцца і раней, аднак, на жаль, існавалі невялікія цяжкасці. Але я вельмі рады, што, няглядзячы ні на што, мы знайшлі магчымасць сустрэцца. Мы сустракаемся ў патрэбным месцы і ў патрэбны час. Яшчэ раз хачу сказаць, што ўсё адбываецца па Божай волі».

 

22.28

Падзея, якая ўвойдзе ў гісторыю!


 

22.20

Гістарычная сустрэча пачалася!

На фота:  (першы план) старшыня Аддзела знешніх царкоўных сувязяў Маскоўскага Патрыярхату Мітрапаліт Валакаламскі Іларыён (злева) паціскае руку кіраўніку Папскай рады спрыяння хрысціянскаму адзінству кардыналу Курту Коху.

(другі план) Патрыярх Маскоўскі і ўсяе Русі Кірыл і Папа Рымскі Францішак


 

22.13

Старшыня Дзяржсавета Кубы Рауль Кастра правёў Пантыфіка ад трапа самалёта ў залу аэрапорта. Па дарозе яны абмяняліся некалькімі фразамі. Іспанская мова — родная для абодвух.



22.01

Самалёт з Папам на борце прыбыў у аэрапорт Гаваны. Сустрэча пачнецца ў 22.20 па беларускім часе.

 

21.56

У аэрапорце Гаваны ідзе апошняя падрыхтоўка да сустрэчы.

У зале вывешаны сцягі і штандарты Ватыкана і Рускай Праваслаўнай Царквы. «Пасярэдзіне, паміж крэсламі, усталяваны праваслаўны крыж з укрыжаваным Хрыстом», — праінфармаваў журналістаў прэс-сакратар Патрыярха а. Аляксандр Волкаў.

Каля 60 журналістаў на адмыслова ўсталяваным памосце чакаюць прыбыцця Папы Рымскага Францішка. Як чакаецца, з Пантыфікам прыедуць яшчэ каля 70 прадстаўнікоў СМІ.

 

21.50

Як стала вядома, тэкст сумеснай дэкларацыі, якую падпішуць абодва іерархі, узгадняўся бакамі да позняга вечара 10 лютага. Пакуль змест дэкларацыі трымаецца ў сакрэце і названа толькі агульная тэматыка сустрэчы — ганенні на хрысціян на Блізкім Усходзе і ў іншых рэгіёнах. [паводле tass.ru, (IL)]

 

21.44

Дэлегацыя Патрыярха Кірыла налічвае прыкладна 100 чалавек. Папу Францішка ў сваю чаргу, як паведамляюць СМІ, будзе суправаджаць дэлегацыя каталіцкіх іерархаў на чале з Дзяржаўным Сакратаром Яго Святасці кардыналам П’етро Паралінам.

Важнае па тэме:

Як паведамляе прэс-сакратар праваслаўнага іерарха, Патрыярх Кірыл на сустрэчы з Папам Францішкам будзе апрануты ў сваё звычайнае адзенне, якое выкарыстоўваецца па-за літургіяй. Да прылёту Папы Рымскага Патрыярха Кірыла чакае кардынал Гаваны Хайве Лукас Артэга-і-Аламіна. [паводле pravmir.ru, (IL)]

 

21.35

Патрыярх Маскоўскі і ўсяе Русі Кірыл завяршыў сустрэчу з Раулем Кастра

На завяршэнне сустрэчы са старшынёй Дзяржсавета Кубы Раулем Кастра Патрыярх Кірыл падарыў 84-гадоваму кубінскаму лідару сваю кнігу «Свабода і адказнасць» у перакладзе на іспанскую мову.

Акрамя гэтага, Патрыярх падарыў Прэзідэнту настольную ікону Пакрова Божай Маці. У адказ Прэзідэнт Кубы перадаў у знак памяці для праваслаўнага іерарха барэльеф з выявай святога Георгія Пабеданосца.

 

20.06

Твіт ад Папы Францішка: «Сёння — дзень Божай ласкі. Сустрэча з Патрыярхам Кірылам — гэта дар ад Бога. Маліцеся за нас».

 

19.18

Дэкларацыя, якую падпішуць Папа Францішак і Патрыярх Кірыл, не будзе насіць тэалагічны характар

Пра гэта распавёў а. Гіацынт Дэстывель OP з Папскай рады спрыяння хрысціянскаму адзінству, які ў ватыканскім ведамстве адказвае за адносіны з праваслаўем у Расіі.

«Гэта будзе сумесная дэкларацыя, у якой хутчэй за ўсё будуць узняты галоўныя тэмы каталіцка-праваслаўнага дыялогу. Дэкларацыя не будзе насіць тэалагічны характар, бо тэалагічны дыялог праходзіць у межах міжнароднай камісіі паміж Каталіцкім Касцёлам і ўсімі Праваслаўнымі Цэрквамі. Таму мы не праводзім тэалагічны дыялог з кожнай аўтаномнай Праваслаўнай Царквой. З Рускай Праваслаўнай Царквой мы вядзём сумесную працу і дыялог, але не ў тэалагічным рэчышчы», — сказаў супрацоўнік ватыканскага ведамства.

У супольнай дэкларацыі, якую ў прысутнасці Прэзідэнта Кубы Рауля Кастра падпішуць Папа Францішак і Патрыярх Кірыл, хутчэй за ўсё будуць закрануты такія тэмы, як пераслед хрысціян на Блізкім Усходзе, сям’я, секулярызацыя, месца хрысціян у секулярызаваным грамадстве, справы моладзі, а таксама ахова жыцця. [паводле KAI, (IL)]

 

18.09

Апостальскі вікарый у Алепа (Сірыя) біскуп Джордж Абу Хазен лічыць сустрэчу Пантыфіка з Патрыярхам плёнам цярпенняў хрысціян на Блізкім Усходзе.

«Гэта сустрэча стане для нас вялікай падтрымкай і дапаможа нам ісці наперад, нават калі для гэтага мы вымушаны будзем цярпець», — сказаў іерарх. Сірыйскі біскуп таксама прыгадаў словы прадстаўніка Маскоўскага Патрыярхату, які некалькі дзён таму адзначыў, што супольны клопат пра церпячых братоў хрысціян на Блізкім Усходзе азначае, што сустрэча Папы Рымскага і Патрыярха вельмі актуальная.

Паводле паведамленняў чакаецца, што сярод іншых тэм Папа і Патрыярх абмяркуюць становішча хрысціян на Блізкім Усходзе. 

«Мы кажам пра гэта ў гаміліях і на нашых сустрэчах. Вернікі ўзмацняюцца ў адвазе, калі чуюць, што іх цярпенні былі нездарма і яны маюць штосьці агульнае з еднасцю паміж разлучанымі братамі, бо Хрыстус нас усіх прытуляе і суцяшае», — дадаў біскуп.
[паводле KAI, (IL)]


16.15

Падчас больш чым 10-гадзіннага пералёту з Рыма ў сталіцу Кубы Папа Францішак звярнуўся да журналістаў у самалёце.

«Гэта вельмі важнае падарожжа і вельмі чаканае: вельмі чаканае маім братам Кірылам, а таксама народам у Мексіцы,» — гэтымі словамі Папа пракаментаваў будучую сустрэчу з Патрыярхам і свой візіт у Мексіку.

Журналісты адзначаюць сардэчнасць Пантыфіка, які прывітаўся асабіста з кожным журналістам у самалёце. [паводле KAI, (IL)]

 

15.10

«Падрыхтоўка да сустрэчы Патрыярха з Папам Рымскім пачалася яшчэ ў 1996 годзе. Тады меркавалася арганізаваць сустрэчу паміж Патрыярхам Алексіем ІІ і Папам Янам Паўлам ІІ».

Пра гэта распавёў супрацоўнік Аддзела знешніх царкоўных сувязяў па міжхрысціянскіх справах Рускай Праваслаўнай Царквы святар Аляксей Дзікароў. Паводле яго слоў, былі вызначаны нават канкрэтныя дата і месца — 21 чэрвеня 1997 года, Вена.

Аднак 10 чэрвеня 1997 года Сінод Рускай Праваслаўнай Царквы, разгледзеўшы актуальны стан адносін паміж Рускай Праваслаўнай Царквой і Рыма-Каталіцкім Касцёлам, прыйшоў да высновы, што сустрэча не падрыхтавана належным чынам.

 

14.41

Фотаздымкі з самалёта, у якім Папа Францішак ляціць у Мексіку праз кубінскую Гавану

Рэйс у Мексіку

Журналісты на рэйсе з Пантыфікам

Асаблівае самбрэра ў падарунак для Папы

[фота з твітар-акаўнта @antoniospadaro, (IL)]

 

14.18

«Сустрэчай тысячагоддзя» называюць сустрэчу Папы Францішка і Патрыярха Кірыла журналісты, якія прыбылі ў Гавану для асвятлення гістарычнай падзеі. Пра гэта сюжэт vesti.ru

 

13.52

Патрыярх Маскоўскі і ўсяе Русі Кірыл стане першым Патрыярхам у гісторыі Рускай Праваслаўнай Царквы, які сустрэнецца з Папам Рымскім асабіста.

У 1964 годзе ў Ерузалеме Папа Рымскі Павел VI сустракаўся з Патрыярхам Канстанцінопальскай Праваслаўнай Царквы Афінагорам (на фота), якая стала першай сустрэчай прадстаўнікоў Праваслаўнай Царквы і Рыма-Каталіцкага Касцёла з 1439 года, калі Маскоўскі Мітрапаліт Ісідор удзельнічаў у Ферара-Фларэнтыйскім саборы.

Пасля сустрэчы ў Ерузалеме Папы Рымскага Паўла VI з Патрыярхам Канстанцінопальскім Афінагорам былі адменены ўзаемныя анафемы, якія існавалі з 1054 года [паводле pravmir.ru,(IL)].

 

13.00 

На сустрэчы Пантыфіка і Патрыярха будзе прысутнічаць Рауль Кастра

Сталі вядомыя падрабязнасці сустрэчы іерархаў. Першыя 15 хвілін сустрэча будзе праходзіць у прысутнасці журналістаў, а затым працягнецца ў закрытым рэжыме. Маліцца разам іерархі не будуць.

  • Сустрэча будзе праходзіць у аэрапорце — па-за межамі якойсьці культавай прасторы
  • Патрыярх і Пантыфік увойдуць у залу сустрэчы з дзвярэй, размешчаных насупраць адна адной
  • Маліцца разам іерархі не будуць
  • Перамовы будуць весціся на рускай і іспанскай мове з паслядоўным перакладам
  • Трансляцыю з месца падзей будуць весці тры тэлеканалы — Russia Today, «Расія 24» і Euronews, а таксама канал youtube Ватыканскага радыё
  • Першыя 15 хвілін сустрэча будзе праходзіць у прысутнасці журналістаў, а затым працягнецца ў закрытым рэжыме
  • Побач з іерархамі будзе размяшчацца Укрыжаванне
  • На сустрэчы будзе прысутнічаць кіраўнік Папскай рады спрыяння хрысціянскаму адзінству кардынал Курт Кох і старшыня Аддзела знешніх царкоўных сувязяў Маскоўскага Патрыярхату Мітрапаліт Валакаламскі Іларыён.
  • Падчас абмену падарункамі да Патрыярха і Пантыфіка далучыцца старшыня Дзяржсавета Кубы Рауль Кастра
  • На час візіту Патрыярха Кірыла і яго перамоваў з Пантыфікам вылеты і прылёты самалётаў з 1-га тэрмінала Гаваны перанеслі ў аэрапорт Вахай у наваколле кубінскай сталіцы. Работа паветранай службы вернецца ў звычайны рэжым з 24.00 14 лютага

12.43

Папа Францішак вылецеў у Лацінскую Амерыку рэйсам у 09.45 па беларускім часе. Сваё падарожжа Cвяты Айцец распачаў з запісу ў твітары: «Давяраю сваё падарожжа Марыі». [паводле Deon. pl,(MV)]

 


12.40

На ватыканскім канале на youtube можна будзе ўбачыць сустрэчу Папы Францішка з Патрыярхам Кірылам у прамым эфіры

 

12.25

Тым часам Патрыярх Маскоўскі і ўсяе Русі Кірыл 11 лютага ўжо распачаў свой візіт у краіны Лацінскай Амерыкі і цяпер знаходзіцца на Кубе. Візіт уключае ў сябе наведванне Рэспублікі Куба, Рэспублікі Парагвай і Федэратыўнай Рэспублікі Бразілія. [паводле pravmir.ru,(IL)].



11.45

Згодна з праграмай Папы Францішка яго прыбыццё ў Гавану (Куба) запланавана на 22.00 па беларускім часе (14.00 па мясцовым часе).

Гістарычная сустрэча Пантыфіка з Патрыярхам Маскоўскім і ўсяе Русі Кірылам пройдзе ў Міжнародным аэрапорце імя Хасэ Марці і будзе доўжыцца дзве гадзіны. Вынікам сустрэчы стане падпісанне сумеснай дэкларацыі Каталіцкага Касцёла і Рускай Праваслаўнай Царквы.

Адразу пасля сустрэчы самалёт з Папам Францішкам пакіне Кубу і працягне палёт у Мексіку. Прыбыццё самалёта ў Міжнародны аэрапорт «Benito Juarez» у Мехіка-сіці запланаваны на 02.30 па беларускім часе (19.30 па мясцовым часе). Пасля гэтага на папамабілі Папа Рымскі паедзе ў Апостальскую Нунцыятуру.

Прывітанне Пантыфіка на нацыянальным узроўні з удзелам прэзідэнта Мексікі Энрыке Пенья ў Нацыянальным палацы краіны адбудзецца 13 лютага ў 16.30 па беларускім часе (09.30 па мясцовым часе).

Важнае па тэме:

 

Агульная інфармацыя пра сустрэчу Папы Рымскага з Патрыярхам Маскоўскім і ўсяе Русі

Самалёт з Пантыфікам на борце здзейсніць пасадку на востраве Куба 12 лютага. Папа Францішак дзеля сустрэчы з Патрыярхам Кірылам спыніцца на шляху ў Мексіку, куды накіроўваецца з афіцыйным візітам. У сваю чаргу Патрыярх Кірыл у межах афіцыйнага візіту ў гэты час таксама знаходзіцца на Кубе.

Сустрэча, якая пройдзе ў гаванскім аэрапорце, адбудзецца ў фармаце «асабістай размовы».

Сустрэча будзе працягвацца каля дзвюх гадзін. Пасля яе Пантыфік і Патрыярх падпішуць сумесную шырокую дэкларацыю. Яе тэкст змешчаны на сямі старонках. Запланавана таксама «спантаннае» выступленне кіраўнікоў Цэркваў, падчас якога яны абмяняюцца сваімі пачуццямі і ўражаннямі ад сустрэчы.


 

Пры выкарыстанні матэрыялаў сайта спасылка на Catholic.By абавязкова.