Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Папскі пасланнік на ўрачыстасці ў Будславе — кардынал Крыстаф Шонбарн OP — прыбыў у Мінск
Беларусь
01.07.2016 01:57

30 чэрвеня вечарам у міжнародным аэрапорце «Мінск-2» прызямліўся самалёт, на борце якога быў арцыбіскуп Вены кардынал Крыстаф Шонбарн OP. Іерарх прызначаны папскім пасланнікам на святкаванне 25-годдзя заснавання Мінска-Магілёўскай мітраполіі, якое пройдзе ў Нацыянальным санктуарыі ў Будславе 1-2 ліпеня.

У Будславе кардынал Крыстаф Шонбарн разам з Мітрапалітам Мінска-Магілёўскім арцыбіскупам Тадэвушам Кандрусевічам прыме ўдзел у начной працэсіі са свечкамі, а таксама ў галоўнай святой Імшы 2 ліпеня, падчас якой прамовіць гамілію.

«У Юбілейны Год Міласэрнасці, падчас якога адбываецца мой візіт, маёй асноўнай місіяй з’яўляецца падзяка Божай міласэрнасці, — адзначыў кардынал у каментарыі Catholic.by. — Касцёл на беларускай зямлі зведаў шмат трагічных падзей, але Божая міласэрнасць дапамагла многім людзям захаваць сваю веру і выкарыстасць яе, так бы мовіць, у выглядзе стартавага капіталу для новага часу і новага грамадства».  

«Я цешуся з таго, што магу пазнаёміцца з краінай, у якую прыбываю ўпершыню. Перадусім я буду рады пазнаёміцца з жывым Касцёлам у Беларусі — Касцёлам, які шмат цярпеў, а цяпер жыве ў адноснай свабодзе веры. І для мяне, як святара з Аўстрыі, безумоўна, гэтае знаёмства будзе жывым сведчаннем веры», — дадаў іерарх.

У праграме прабывання кардынала Шонбарна ў Беларусі акрамя ўдзелу ў будслаўскіх урачыстасцях — сустрэчы з каталіцкімі і праваслаўнымі іерархамі, прадстаўнікамі ўлады, наведванне месца памяці нацысцкіх ахвяр у Трасцянцы і інш.

Іерарх з’яўляецца старшынёй Канферэнцыі Каталіцкіх Біскупаў у Аўстрыі, а таксама ўваходзіць у якасці ганаровага члена ў шэраг Кангрэгацый і Папскіх радаў у Ватыкане. Кардынал Шонбарн быў адным з удзельнікаў Сінода Біскупаў на тэму сям’і, а ў красавіку 2016 года яму была даручана місія прэзентаваць Апостальскую адгартацыю Папы Францішка «Amoris Laetitia» (Радасць любові) па выніках Сінода.

Поўнае імя кардынала — Крыстаф Марыя Міхаэль Гуга Дам’ян Петэр Адальберт фон Шонбарн. Ён паходзіць з аўстравенгерскай графскай сям’і. Валодае шасцю мовамі. З’яўляецца айцом дамініканінам.
Ілья Лапато, фота Віталія Палінеўскага


Фотарэпартаж
 

Пры выкарыстанні матэрыялаў сайта спасылка на Catholic.By абавязкова.