25–26 лістапада 2011 г. у Слоніме праходзіў футбольны турнір памяці благаслаўлёнага Яна Паўла ІІ. У гульні прынялі ўдзел 10 каманд з парафій Гродзенскай і Пінскай дыяцэзій.

Прыехалі каманды з парафій Беззаганнага Зачацця Найсвяцейшай Панны Марыі (Гродна-Паўднёвы), Св. Андрэя Апостала ў Слоніме, Маці Божай Вастрабрамскай (аўгустовак) у Гродне, Св. Сям’і ў Лідзе, Св. Роха ў Грандзічах, Унебаўзяцця Найсвяцейшай Панны Марыі i св. Язафата Кунцэвіча ў Сапоцкіне, Узвышэння Святога Крыжа ў Вілейцы, Маці Божай Каралевы ў Брэсце, Св. Тэрэзы ў Шчучыне, а таксама каманда святароў.

Першы дзень турніру распачаўся св. Імшой, якую ўзначаліў арганізатар матчу кс. Артур Малафей. Гамілію прамовіў а. Андрэй Букштан OFMCap, пробашч парафіі ў Слоніме, які таксама правёў пасля літургіі канферэнцыю для ўдзельнікаў турніру. Пасля канферэнцыі адбылася жараб’ёўка каманд, якую правёў галоўны спонсар турніру Баляслаў Івашка. На адкрыцці турніру прысутнічаў Начальнік аддзела спорту і турызму г. Слоніма Генадзь Лявонаў.

Другі дзень турніру таксама распачаўся ўдзелам у св. Імшы, якую цэлебраваў а. Анатоль Ярошка OFMCap. Крыху пазней каманды прынялі ўдзел у матчах за выніковыя месцы на турніры.

На ўзнагароджанні каманд прысутнічаў консул пасольства Польшчы ў Гродне Яцак Доліва. Усе ўдзельнікі турніру былі ўзнагароджаны каштоўнымі прызамі.

Выніковыя месцы каманд:

1 — Слонім (Св. Андрэя Апостала)
2 — Гродна-Паўднёвы (Беззаганнага Зачацця Найсвяцейшай Панны Марыі)
3 — Грандзічы (Св. Роха)
4 — Ліда (Св. Сям’і)
5 — Гродна (Маці Божай Вастрабрамскай (аўгустовак))
6 — Брэст (Маці Божай Каралевы)
7 — Сапоцкін (Унебаўзяцця Найсвяцейшай Панны Марыі i св. Язафата Кунцэвіча)
8 — Шчучын (Св. Тэрэзы)
9 — каманда святароў
10 — Вілейка (Узвышэння Святога Крыжа)

Лепшым гульцом турніру прызнаны Юрый Каліберда (Гродна-Паўднёвы). Лепшы варатар турніру — Сяргей Сахарук (Слонім). Лепшы бамбардзір турніру — Вадзім Спасюк (Слонім). Прыз глядацкіх сімпатый атрымала каманда з Брэста.

Арганізатарамі турніру выступілі: кс. Артур Малафей (адказны па справах спорту і фізічнага выхавання ў Гродзенскай дыяцэзіі) і Аляксандр Гусар (начальнік футбольнага клуба «Камунальнік» г. Слоніма).