7 снежня ў гродзенскім катэдральным касцёле біскуп Аляксандр Кашкевіч
удзяліў дзесяці навучэнцам Вышэйшай духоўнай семінарыі ў Гродне
дыяканскае і прэзбітэрскае пасвячэнні. Прэзбітэрскае пасвячэнне атрымалі дыякан Павел Безляповіч і дыякан Юрый Гурскі, дыяканскае пасвячэнне - Павел Раманоўскі, Дзмітрый Леўчык, Аляксандр Сямінскі, Аляксандр Вараб’ёў, Марэк Занеўскі, Алег Яновіч, Павел Мазан, Юрый Садоўскі. У Імшы ўдзельнічалі святары, выкладчыкі і выхавацелі Вышэйшай духоўнай семінарыі ў Гродне. Гродзенскаму ардынарыю прадставіў кандыдатаў да пасвячэння біскуп намінат Юзаф Станеўскі (прызначаны дапаможным біскупам дыяцэзіі), які на працягу семінарыйнай фармацыі суправаджаў іх як рэктар семінарыі.
Біскуп намінат звярнуўся да прысутных з гаміліяй, адзначыўшы, што “Хтосьці ведае гэтых кандыдатаў лепш за нас – гэта Хрыстус, які паклікаў іх па імені”, “паклікаў умацоўваць братоў у веры”. “Як Хрыстус ускладаў рукі на апосталаў, так сёння біскуп ускладзе рукі на вас, каб перадаць вам Божы дотык, - сказаў біскуп намінат кандыдатам да пасвячэння. – Так і вы перададзіце гэты дотык далей, вашы рукі будуць прыладай служэння”.
Па словах біскупа наміната, “святар павінен быць чалавекам малітвы”, бо “сённяшні свет, дзе пануе гарачкавы актывізм, часта губляе арыентацыю”, а “час, аддадзены Хрысту ў ціхай малітве, не з’яўлецца страчаным”, і “менавіта на малітве нараджаюцца найлепшыя плёны пастырскага служэння”. “Хрысту патрэбны святары сталыя, здольныя практыкаваць духоўнае айцоўства”, - дадаў рэктар семінарыі.
Біскуп Аляксандр Кашкевіч, звяртаючыся да прысутных, нагадаў словы бл. Яна Паўла ІІ, які называў святарства “дарам і таямніцай”. “Пакліканне – дар не толькі для саміх пакліканых, але і для ўсёй супольнасці Касцёла, бо ўсе вернікі карыстаюцца плёнамі сакрамэнтальнага служэння святароў і дыяканаў”, - дадаў іерарх. Пры сакрамэнце пасвячэння, адзначыў біскуп, знешне “чалавек не змяняецца”, але “сакрамэнтальная ласка здзяйсняе ў ім вялікую змену”.
“Разам з вамі мы сёння дзякуем Богу за дар і таямніцу вашага паклікання, - сказаў біскуп, звяртаючыся да новых дыяканаў і святароў. – За тое, што Бог вас выбраў, паклікаў, адарыў сакрамэнтальнай ласкай, “каб вы ішлі і прыносілі плён”.
Гродзенскі ардынарый выказаў удзячнасць бацькам, блізкім і родным новых святароў і дыяканаў і ўсім, хто быў іх выхавацелямі і сведкамі веры. “Дзякую, што вы перадалі ім дар веры, навучылі любіць Бога і бліжняга. Дзякую, што былі і далей з’яўляецеся прыкладам хрысціянскага жыцця”, - дадаў іерарх.
Біскуп папрасіў родных і блізкіх новапрэзбітэраў і дыяканаў дапамагаць ім малітвай. “Памятайце, што ваша духоўная дапамога будзе ім заўсёды патрэбна на нялёгкім шляху святарскага служэння”, - падкрэсліў іерарх.
(JM), (AG)
|