Практыкаваць, аднаўляць, вызнаваць сваю веру нанова дзень за днём пакліканы кожны хрысціянін. Так, рыхтуючы сэрцы да Вялікадня, які набліжаецца, перажылі велікапосныя рэкалекцыі навучэнцы Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску.

Праводзіў іх для семінарыстаў а. Аляксандр Жарнасек MIC з Оршы. На працягу некалькіх дзён, з 1 па 4 сакавіка, святар маліўся разам з супольнасцю семінарыі, прапаведаваў Хрыста, сведчыў аб дзеянні Бога ў сваім уласным жыцці і жыцці людзей, якіх ведае асабіста. Рэкалекцыяніст расказваў пра звычайныя, фундаментальныя рэчы, на якія часта звяртаецца мала ўвагі.

Святар адзначаў, што найперш трэба стаць чалавекам, потым хрысціянінам, і толькі пасля гэтага можна быць шчаслівым на шляху служэння Богу. Cловы сведчання заўсёды мацнейшыя за навуковыя тэарэтычныя веды, з якімі можна згаджацца ці не згаджацца.

Сведчанні — гэта факты ў жыцці жывога, рэальнага чалавека, якія існуюць, незалежна ад прыняцця. Так і навука гэтых дзён была падмацавана шматлікімі сведчаннямі з мноства жыццёвых гісторый.

Святое маўчанне, якое захоўвалася ў семінарыі на працягу рэкалекцый, дапамагала лепш засяродзіцца, сабраць думкі, якія звычайна распылены на штодзённыя клопаты. Гэта быў не толькі час адпачынку ад лекцый, але і вялікая духоўная праца, час глыбокага аднаўлення адносін з Богам, паглыблення еднасці з Ім.

Гэтыя чатыры дні сталі для ўдзельнікаў рэкалекцый часам багатага сеяння Божага слова ў сэрцы тых, хто быў адкрыты на яго.

Андрэй Багдановіч
Фота Андрэя Бурака