13 сакавіка па вуліцах Баранавіч быў праведзены Крыжовы шлях, у якім удзельнічалі вернікі з усіх парафій горада. Традыцыйна Крыжовы шлях падрыхтавала парафія Узвышэння Святога Крыжа.

На вуліцы Баранавіч католікі выйшлі ўжо трэці год запар. Набажэнства пачалося каля касцёла Узвышэння Святога Крыжа.

У гэты дзень вернікі маглі адчуць на сабе цяжар крыжа, таму што ад прыпынку да прыпынку была магчымасць дапамагчы несці драўляны крыж — сімвал мукі Пана.

У набажэнстве ўдзельнічалі таксама святары і законныя сёстры з усіх парафій горада.

Упершыню традыцыя маліцца на месцах, звязаных з мукай Пана, узнікла ў Ерузалеме. У Касцёл звычай духоўных перажыванняў Ягоных пакутаў прыйшоў у Сярэднявеччы, дзякуючы намаганням францішканаў. Ва ўсім Касцёле пачалі ўзводзіць так званыя «прыпынкі» Панскай мукі, праходзячы якія, вернікі аднаўляюць у памяці пакуты Хрыста і разважаюць над імі.

Алена Лапкоўская,

фота бр. Корнэля Консэка SVD
больш фота на Crux.by