Святы Айцец Бэнэдыкт XVI выказаў «глыбокі смутак» з прычыны гібелі пакістанскага міністра па справах рэлігійных меншасцяў Шабхаза Бхацці, які быў застрэлены ў Ісламабадзе 3 сакавіка 2011 г. Спачувальная тэлеграма, высланая Дзяржаўным сакратаром Яго Святасці кардыналам Тарчызіо Бэртонэ на імя старшыні епіскапату Пакістана, запэўнівае ў малітве Папы аб супакоі для «высакароднай душы» забітага.

У пасланні таксама выказваюцца спачуванні сям’і міністра і «ўсім, хто аплаквае смерць гэтага шчырага і адважнага слугі пакістанскага народа».

Шабхаз Бхацці быў рашучым праціўнікам прынятага ў Пакістане закону аб блюзнерстве, які прадугледжвае жорсткае пакаранне за абразу пачуццяў мусульманскай большасці. Закон выкарыстоўваўся для ўціску рэлігійных меншасцяў у краіне.

Замах на міністра адбыўся ў цэнтры Ісламабада, калі палітык накіроўваўся на працу. Нягледзячы на пагрозы, якія ён атрымліваў ад талібаў, улады не забяспечылі яму належнай аховы. Да аўтамабіля міністра пад’ехалі на матацыклах трое ўзброеных людзей і застрэлілі яго.

Шабхаз Бхацці быў першым у гісторыі Пакістана хрысціянінам на пасадзе міністра. У сваёй працы ён актыўна абараняў правы немусульманскага насельніцтва, у тым ліку хрысціян.