Прызначэнне Святым Айцом Бэнэдыктам XVI шасці новых кардыналаў, якія паходзяць не з Еўропы, —  гэта «жэст універсальнасці Касцёла». Так адзін з найбольш уплывовых амерыканскіх каталіцкіх інтэрнэт-рэсурсаў «National catholic register» пракаментаваў нядаўняе рашэнне Папы аб скліканні другой у гэтым годзе кансісторыі.

Новыя члены Калегіі кардыналаў атрымаюць пурпурныя бірэты 24 лістапада.

Падчас абвяшчэння свайго рашэння Святы Айцец заўважыў, што шэсць новых кардыналаў не з Еўропы. І гэта, дадаў Папа, сведчыць аб тым, што Касцёл «для ўсіх народаў, гаворыць на ўсіх мовах», «гэта заўсёды Касцёл Пяцідзясятніцы, Касцёл не аднаго кантынента, але Касцёл паўсюдны».

«National catholic register», на які спасылаецца Ватыканскае радыё, нагадвае, што гэта будзе пятая ў Пантыфікаце Бэнэдыкта XVI кансісторыя, пасля якой агульная колькасць прызначаных ім кардыналаў складзе 90. Па стане на 24 лістапада Калегія кардыналаў будзе налічваць 211 чалавек, з якіх 120 будуць мець права голасу на канклаве.

(AG)