14 студзеня папа Бэнэдыкт XVI сустрэўся з супрацоўнікамі італьянскай паліцыі, якая сочыць за парадкам на плошчы Св. Пятра, тэрыторыі вакол Ватыкана і арганізуе бяспеку Пантыфіка падчас падарожжаў па Італіі. Візіт паліцэйскіх і іх сем’яў да Святога Айца пасля свята Божага Нараджэння з’яўляецца даўняй традыцыяй.

Бэнэдыкт XVI адзначыў высокі прафесіяналізм, з якім паліцэйскія выконваюць свае абавязкі, асабліва падчас сустрэч вернікаў і пілігрымаў, што прыбываюць з усяго свету. Святы Айцец падкрэсліў, што ўзорная служба паліцэйскіх сведчыць аб «добрых адносінах, якія існуюць паміж Італіяй і Апостальскай Сталіцай».

«Ад усяго сэрца жадаю, каб ваша праца, якая часам звязана з ахвярнасцю і рызыкай, заўсёды натхнялася моцнай хрысціянскай верай, якая без сумнення з’яўляецца самым каштоўным духоўным скарбам, які быў перададзены вам у вашых сем’ях і які вы пакліканы перадаць сваім дзецям. Год веры, які перажывае ўвесь Касцёл, з’яўляецца магчымасцю таксама для вас звярнуцца да паслання Евангелля і дазволіць яму глыбока ўвайсці ў вашы сумленні і штодзённае жыццё, каб з адвагай даваць сведчанне аб любові Божай», — сказаў Папа, словы якога прыводзіць Ватыканскае радыё.

Бэнэдыкт XVI пажадаў, каб праца паліцэйскіх была гарантыяй парадку і спакою, якія з’яўляюцца фундаментам мірнага і поўнага грамадскага жыцця, плёнам евангельскага паслання, а таксама знакам сапраўднай цывілізаванасці.

(AG)