«Радасць кансэкраванага жыцця заўсёды праходзіць праз удзел у крыжы Хрыста», — з такімі словамі Бэнэдыкт XVI звярнуўся да ўдзельнікаў святой Імшы, якая 2 лютага, у свята Ахвяравання Пана, прайшла ў ватыканскай базыліцы. У гаміліі Папа паразважаў аб прадстаўленні гэтай падзеі ў Святым Пісанні і даў некаторыя парады кансэкраваным асобам.

Пантыфік адзначыў, што ў якасці ахвяравання Богу Панна Марыя і святы Юзаф прынеслі двух галубоў, што паказвае сутнасць Святой Сям’і: яны былі «людзьмі простымі, пакорнымі, але вельмі веруючымі — адной з тых сем’яў, што належала да бедных Ізраэля, з якіх складаўся сапраўдны народ Божы». Папа дадаў, што ахвяраванне адбылося менавіта ў святыні, хоць паводле яўрэйскіх законаў гэта можна было зрабіць і дома. Гэта дае магчымасць ясна заззяць тэме ахвяры і святарства. Бэнэдыкт XVI падкрэсліў, што ў Пасланні да Габрэяў гэтая тэма была ўмацавана ўвядзеннем у яе цярпення як абавязковага элементу. «Як Ён сам пакутаваў, будучы спакушаемым, то можа і тым, хто церпіць спакусы, дапамагчы», — нагадаў Святы Айцец словы апостала Паўла.

Пантыфік звярнуў увагу, што характэрным элементам свята Ахвяравання Пана з’яўляецца святло свечак. Паводле Папы, гэтае святло — знак «прыгажосці і каштоўнасці кансэкраванага жыцця, як адлюстравання святла Хрыста, знак, які нагадвае аб уваходзе Марыі ў святыню». «Панна Марыя, дасканала Кансэкраваная, несла на руках само Святло, уцелаўлёнае Слова, якое прыйшло, каб разагнаць цемру свету любоўю Бога», — сказаў Папа, словы якога прыводзіць Ватыканскае радыё.

Звяртаючыся да кансэкраваных асобаў, Святы Айцец даў ім тры парады: першая датычылася неабходнасці ўмацавання веры, якая дапаможа ўпоўні асвяціць іх пакліканне; другая — з дапамогай веры бачыць мудрасць, якая заключаецца ў слабасці; і, нарэшце, трэцяя — абнаўляць веру, якая дапаможа рабіць неабходныя крокі на шляху ў будучыню.

(AG)