Папа Францішак удзеліць сакрамэнт канфірмацыі 40 маладым людзям з усіх кантынентаў, у тым ліку двум прадстаўнікам Беларусі — Эдуарду Зелянко і Ірыне Юневіч з мінскай парафіі Найсвяцейшай Тройцы. Гэта адбудзецца 28 красавіка падчас літургіі на плошчы Св. Пятра ў Ватыкане.

14 красавіка Святы Айцец наведаў базыліку св. Паўла за Мурамі. Падчас літургіі папа Францішак звярнуў увагу на асобу св. Паўла, магіла якога знаходзіцца ў гэтай рымскай базыліцы, які абвяшчаў Хрыста, засведчыў пра Яго сваёй мучаніцкай смерцю і праславіў Яго ўсім сэрцам.

14 красавіка ў профілі папы Францішка ў «Твітэры» з’явіліся новыя запісы. «Не будзем забывацца: калі мы абвяшчаем Евангелле Езуса, наша жыццё павінна быць сведчаннем гэтага», — так гучыць першы запіс.

12 красавіка папа Францішак наведаў Дзяржаўны сакратарыят Ватыкана, каб падзякаваць яго супрацоўнікам. З Пантыфікам сустрэліся каля 300 працаўнікоў гэтай установы — святары, свецкія і кансэкраваныя асобы.

На інтэрпрэтацыю Святога Пісання звярнуў увагу папа Францішак падчас сустрэчы з удзельнікамі пленарнага пасяджэння Папскай біблійнай камісіі на тэму «Натхненне і праўда ў Бібліі». Пасяджэнне праходзіла ў Ватыкане з 8 па 12 красавіка.

11 красавіка адзначаецца 50-годдзе абвяшчэння энцыклікі «Pacem in Terris». Сведкам яе ўзнікнення быў асабісты сакратар папы Яна XXIII арцыбіскуп Ларыс Капавіла. «Пастава Яна ХХІІІ нагадвае мне некаторыя словы папы Францішка: будзем ісці разам, разам будаваць і абвяшчаць дабрыню, міласэрнасць і любоў Бога», — заўважыў іерарх.

«Дзякую за ваш жэст блізкасці і любові. (...) Дзякую таксама, што моліцеся за мяне, і прашу працягваць малітву, у якой маю вялікую патрэбу», — напісаў папа Францішак рымскаму «Карытас» у адказ на ліст ад хворых, бедных і бяздомных Вечнага Горада.

11 красавіка Святы Айцец Францішак прыняў на аўдыенцыі членаў «Papal Foundation» (Папскага фонду) — амерыканскай дабрачыннай арганізацыі, якая фінансава дапамагае Пантыфіку ў вырашэнні многіх праблем сусветнага маштабу. Фонд адзначае 25-годдзе сваёй дзейнасці, і з гэтай нагоды яго члены прыбылі ў Вечны Горад, каб сустрэцца з Папам.

Папа Францішак падзякаваў кіраўніцтву і балельшчыкам клуба «Сан-Ларэнса» з Буэнас-Айрэса за віншаванні і цёплыя словы, якія атрымаў ад іх пасля абрання на Святы Пасад. У лісце прэзідэнту клуба Пантыфік папрасіў іх паглыбляць сувязь з Езусам — «сапраўдным сябрам, які заўсёды будзе з вамі ў шчаслівыя хвіліны і ў час цяжкасцяў».

10 красавіка, пасля агульнай аўдыенцыі, у профілі папы Францішка ў «Твітэры» з’явіліся новыя запісы. «Быць хрысціянамі — значыць не толькі выконваць запаведзі: гэта значыць дазволіць Хрысту авалодаць нашым жыццём і перамяніць яго», — так гучыць першы з запісаў.

Папа Францішак запэўніў у сваёй малітве за ахвяраў землятрусу ў Іране. Пантыфік сказаў аб гэтым на заканчэнне агульнай аўдыенцыі на плошчы Св. Пятра 10 красавіка.

Падчас сустрэчы 9 красавіка папа Францішак і Генеральны сакратар ААН Пан Гі Мун абмеркавалі пытанні сацыяльнай справядлівасці ў свеце і «мэты развіцця тысячагоддзя», якія краіны-члены ААН пастанавілі асягнуць да 2015 г., Па словах Пан Гі Муна, выкананне гэтага плану асабліва важна для бедных слаёў грамадстваў, і менавіта іх лёс найбольш цікавіць Пантыфіка.

Італьянская правінцыя Таварыства Езуса арганізуе канцэрт для папы Францішка. Ён адбудзецца 18 красавіка ў 19 гадзін у касцёле св. Ігнацыя ў Рыме.

9 красавіка папа Францішак прыняў на аўдыенцыі Генеральнага сакратара ААН Пан Гі Муна. Падчас сустрэчы карэйскі палітык падкрэсліў, што Аб’яднаныя Нацыі і Апостальская Сталіца маюць супольныя ідэі і мэты.

Святы Айцец Францішак выказаў спачуванні ў сувязі са смерцю былога брытанскага прэм’ер-міністра Маргарэт Тэтчэр. У тэлеграме, скіраванай 8 красавіка на імя кіраўніка ўраду Дэвіда Кэмерана, Папа з удзячнасцю адзначыў імкненне спачылай кіравацца хрысціянскімі каштоўнасцямі ў дзяржаўнай службе і «распаўсюджванні свабоды ў сям’і народаў».

«Папа Францішак намераны клапаціцца аб адзінстве хрысціян. Важнай і плённай у гэтым сэнсе стала сённяшняя сустрэча са старшынёй Рады Евангелічнай Царквы ў Германіі прэзэсам Нікалаусам Шнайдэрам», — адзначыў 8 красавіка кіраўнік Прэс-службы Апостальскай Сталіцы кс. Фэдэрыка Ламбардзі.

Папа Францішак наведае езуіцкі цэнтр дапамогі бежанцам у Рыме. Пра гэта паведаміў 7 красавіка дырэктар цэнтра «Astalli» кс. Джаванні Ла Мана.

8 красавіка папа Францішак прыняў на аўдыенцыі старшыню Рады Евангелічнай Царквы ў Германіі прэзэса Нікалауса Шнайдэра. Ён стаў першым лідарам адной з пратэстанцкіх Цэркваў, з якім сустрэўся Пантыфік.

Першы раз за апошнія 35 гадоў Рымскі Пантыфік благаславіў вернікаў з цэнтральнай лоджыі базылікі св. Яна на Латэране. Гэта адбылося вечарам 7 красавіка, на заканчэнне інгрэсу Святога Айца Францішка на рымскую кафедру.

7 красавіка, у дзень інгрэсу Святога Айца Францішка на рымскую кафедру, у профілі Папы ў «Твітэры» з’явіўся новы запіс. «Які цудоўны позірк, што звяртае на нас Езус, — ён поўны пяшчоты! Не будзем жа ніколі губляць веры ў цярплівасць і міласэрнасць Бога», — так гучаць словы Пантыфіка.